ഐപിഎല്‍ 12ാം സീസണില്‍ പ്ലേ ഓഫ് കാണാതെ പുറത്താകുന്ന ആദ്യ ടീമായി റോയല്‍ ചലഞ്ചേഴ്‌സ് ബാംഗ്ലൂര്‍. ഇന്നലെ മഴ കാരണം രാജസ്ഥാന്‍ റോയല്‍സിനെതിരായ മത്സരം ഉപേക്ഷിച്ചതോടെയാണ് ബാംഗ്ലൂര്‍ ടൂര്‍ണമെന്റില്‍ പ്ലേ ഓഫ് കടക്കാതെ പുറത്തായത്.
കളിച്ച 13 മത്സരങ്ങളില്‍ നിന്ന് 9 പോയിന്റ് മാത്രമാണ് ബാംഗ്ലൂര്‍ ടീം നേടിയിട്ടുള്ളത്. ശേഷിക്കുന്ന ഒരു മത്സരം വിജയിച്ചാലും ആകെ പോയിന്റ് നേട്ടം 11 ലെത്തിക്കാനെ ബാംഗ്ലൂരിന് സാധിക്കൂ. നിലവില്‍ നാലാം സ്ഥാനത്തുള്ള ഹൈദരാബാദിന് ഇപ്പോള്‍ത്തന്നെ 12 പോയിന്റുണ്ട്. ഇതോടെയാണ് ബാംഗ്ലൂര്‍ പുറത്തായതായി ഉറപ്പായത്.
ദയനീയ പ്രകടനങ്ങളായിരുന്നു ഈ സീസണില്‍ റോയല്‍ ചലഞ്ചേഴ്‌സ് ബാംഗ്ലൂരിന്റേത്. 13 മത്സരങ്ങളില്‍ 4 എണ്ണത്തില്‍ മാത്രം വിജയിക്കാന്‍ കഴിഞ്ഞ അവര്‍ 8 പരാജയങ്ങളും ഏറ്റുവാങ്ങി. മെയ് നാലാം തീയതി സണ്‍ റൈസേഴ്‌സ് ഹൈദരാബാദിനെതിരെയാണ് ബാംഗ്ലൂരിന്റെ അവസാന മത്സരം.
