വരുന്ന സീസണിലെ ഐപിഎല്‍ മത്സരക്രമം പുറത്തുവിട്ടു. ഉദ്ഘാടന മത്സരത്തില്‍ കഴിഞ്ഞ സീസണിലെ ചാമ്പ്യന്മാരായ ചെന്നൈ സൂപ്പര്‍ കിംഗ്‌സ് റണ്ണേഴ്‌സ് അപ്പായ കൊല്‍ക്കത്ത നൈറ്റ് റൈഡേഴ്‌സിനെ നേരിടും. മാര്‍ച്ച് 26 ശനിയാഴ്ച രാത്രി 7.30നാണ് മത്സരം. ലീഗ് മത്സരങ്ങളുടെ പട്ടികയാണ് പുറത്തുവിട്ടത്. പ്ലേ ഓഫ് മത്സരങ്ങളുടെ വിവരങ്ങള്‍ പിന്നീട് പ്രഖ്യാപിക്കും.
ലീഗ് ഘട്ടത്തില്‍ 70 മത്സരങ്ങളാണ് ഉള്ളത്. ഈ മത്സരങ്ങള്‍ മഹാരാഷ്ട്രയിലെ വാംഖഡെ സ്റ്റേഡിയം, ബ്രാബോണ്‍ സ്റ്റേഡിയം, ഡിവൈ പാട്ടില്‍ സ്റ്റേഡിയം, ജിയോ സ്റ്റേഡിയം, മഹാരാഷ്ട്ര ക്രിക്കറ്റ് അസോസിയേഷന്‍ സ്റ്റേഡിയം എന്നീ വേദികളിലാവും നടക്കുക. മുംബൈയിലെ മൂന്ന് സ്റ്റേഡിയങ്ങളില്‍ 55 മത്സരങ്ങളും ബാക്കി 15 മത്സരങ്ങള്‍ പൂനെയിലുമാണ്. വാംഖഡെയിലും ഡിവൈ പാട്ടീല്‍ സ്റ്റേഡിയത്തിലും 20 മത്സരങ്ങള്‍ വീതം നടക്കുമ്പോള്‍ ബ്രാബോണ്‍ സ്റ്റേഡിയത്തില്‍ 15 മത്സരങ്ങളുണ്ടാവും.
