ഐപിഎല്ലില്‍ സണ്‍റൈസേഴ്സിനെതിരെ ജയം സ്വന്തമാക്കി കൊല്‍ക്കത്ത. ആറു വിക്കറ്റിനാണ് ഹൈദരാബാദിനെ തോല്‍പ്പിച്ച് കൊല്‍ക്കത്ത തകര്‍പ്പന്‍ ജയം നേടിയത്. 182 റണ്‍സ് വിജയലക്ഷ്യം പിന്തുടര്‍ന്ന കൊല്‍ക്കത്ത അവസാന ഓവറില്‍ രണ്ടു പന്തുകള്‍ ബാക്കി നില്‍ക്കെ ലക്ഷ്യം മറികടക്കുകയായിരുന്നു. അവസാന ഓവറില്‍ കൊല്‍ക്കത്തയ്ക്ക് 13 റണ്‍സാണ് ജയിക്കാന്‍ വേണ്ടിയിരുന്നത്.
അവസാന ഓവറുകളില്‍ മിന്നുന്ന പ്രകടനം കാഴ്ചവെച്ച ആന്ദ്രെ റസ്സലും ശുഭ്മാന്‍ ഗില്ലുമാണ് കൊല്‍ക്കത്തയ്ക്കായി മികച്ച പ്രകടനം കാഴ്‌ച വച്ചത്. 19 പന്തില്‍ നിന്ന് 49 റണ്‍സെടുത്ത റസ്സലും 10 പന്തില്‍ നിന്ന് 18 റണ്‍സെടുത്ത ഗില്ലും പുറത്താകാതെ നിന്നു. നിതീഷ് റാണ 47 പന്തില്‍ 68 റണ്‍സ് നേടി കൊല്‍ക്കത്തയ്ക്ക് മികച്ച തുടക്കം നല്‍കിയിരുന്നു.
ടോസ് നേടി ബാറ്റിംഗ് തെരഞ്ഞെടുത്ത ഹൈദരാബാദ് നിശ്ചിത ഓവറില്‍ മൂന്നു വിക്കറ്റ് നഷ്ടത്തില്‍ 181 റണ്‍സെടുത്തു. 53 പന്തില്‍ നിന്ന് 85 റണ്‍സടിച്ച ഓസീസ് താരം ഡേവിഡ് വാര്‍ണറുടെ അര്‍ദ്ധ സെഞ്ച്വറിയുടെ മികവിലാണ് സണ്റൈസേഴ്സ് ഹൈദരാബാദ് മികച്ച സ്‌കോര്‍ പടുത്തുയര്‍ത്തിയത്.
