കൊച്ചി: പൂനെക്കെതിരെ കൊച്ചിയിലെ മൈതാനത്ത് കളിക്കാനിറങ്ങിയ കേരളാ ബ്ലാസ്റ്റേഴ്സിന് വീണ്ടും സമനിലക്കുരുക്ക്. ഒരു ഗോളിന് പിന്നില്‍ നിന്ന ആദ്യ പകുതിയ്ക്ക് ശേഷം 74 -ാം മിനുട്ടിലാണ് സിഫിനോസിസിന്റെ ബൂട്ടില്‍ നിന്നാണ് ബ്ലാസ്റ്റേഴ്സിന് വേണ്ടി സമനില ഗോള്‍ നേടിയത്.
മുപ്പതാം മിനുട്ടില്‍ മാര്‍സലീന്യോയാണ് പൂനെയ്ക്ക് വേണ്ടി ഗോള്‍ നേടിയത്. കളിമികവ് പുറത്തെടുക്കാനാവാതെ പോയ ബ്ലാസ്റ്റേഴ്സ് പ്രതിരോധ നിരയെ സമര്‍ദ്ദമായി കബളിപ്പിച്ചാണ് മാര്‍സലീന്യോ ഗോള്‍ നേടിയത്.
ഏറെ പ്രതീക്ഷകളോടെ മാഞ്ചസ്റ്റര്‍ യുണൈറ്റഡില്‍ നിന്നും എത്തിച്ച റെനെ മ്യൂളന്‍ സ്റ്റീനിനെ പാതിവഴിയില്‍ പറഞ്ഞുവിട്ട കേരള ബ്ലാസ്റ്റേഴ്സ് ഐ.എസ്.എല്‍ ആദ്യ സീസണിലെ തങ്ങളുടെ നായകനും കോച്ചുമായിരുന്ന ഇംഗ്‌ളീഷ് ഗോളി ഡേവിഡ് ജെയിംസിനെയാണ് പരിശീലകനായി തിരിച്ചുവിളിച്ചിരിക്കുന്നത്.
കൊച്ചിയിലെ ഹോം ഗ്രൗണ്ടില്‍ പൂനെ സിറ്റിക്കെതിരെ ബൂട്ടുകെട്ടിയ ബ്ലാസ്റ്റേഴ്സ് പഴയ മാര്‍ക്വീ താരത്തിന് കീഴില്‍ പുതിയൊരു തുടക്കമിടാനുള്ള ശ്രമത്തിലായിരുന്നു. എന്നാല്‍ കളമറിഞ്ഞ് കളിച്ച പൂനെ മത്സരം സമനിലയിലൊതുക്കുകയായിരുന്നു.
എട്ടു മത്സരങ്ങള്‍ പൂര്‍ത്തിയാക്കിയപ്പോള്‍ ബ്ലാസ്റ്റേഴ്സിന് എട്ടു പോയിന്റ് മാത്രമാണുള്ളത്. 16 പോയിന്റുള്ള പൂന എഫ്‌സി പോയിന്റ് പട്ടികയില്‍ ഒന്നാം സ്ഥാനത്തേക്കുയര്‍ന്നു.
