ശ്രീനഗര്‍: ജമ്മു കശ്മീരിലെ ഷോപ്പിയാനില്‍ ഏറ്റുമുട്ടല്‍. സുരക്ഷ സേന മൂന്ന് തീവ്രവാദികളെ വധിച്ചു.കൊല്ലപ്പെട്ട ഭീകരരെ തിരിച്ചറിഞ്ഞിട്ടില്ല.
സേന പ്രദേശത്ത് തെരച്ചില്‍ തുടരുകയാണ്.
ശ്രീനഗറില്‍നിന്ന് 60 കിലോമീറ്റര്‍ അകലെ ഷോപ്പിയാനിലെ തുര്‍ക്വംഗാം ഗ്രാമത്തില്‍ പുലര്‍ച്ചെ 5 മണിയോടെയാണ് ഏറ്റുമുട്ടലുണ്ടായത്.
സംഭവസ്ഥലത്തുനിന്ന് ഒരു ഇന്‍സാസ് റൈഫിളും രണ്ട് എകെ 47 തോക്കുകളും കണ്ടെടുത്തതായും സൈന്യം അറിയിച്ചു. പ്രദേശത്ത് തിരച്ചില്‍ ശക്തമാക്കി. രാഷ്ട്രീയ റൈഫിള്‍സിന്റെ ക്യാംപില്‍നിന്ന് ഏതാണ്ട് 500 മീറ്റര്‍ മാത്രം അകലെയായിരുന്നു എറ്റുമുട്ടല്‍.
ജമ്മു കശ്മീരില്‍ കഴിഞ്ഞ 18 ദിവസത്തിനിടയില്‍ 27 തീവ്രവാദികളെ വധിച്ചതായി ഡിജിപി ദില്‍ബാഗ് സിംഗ് ഇന്നലെ പറഞ്ഞിരുന്നു. ഇതിനു പിന്നാലെയാണ് ഇന്ന് വീണ്ടും ഏറ്റുമുട്ടലിന്റെ വാര്‍ത്ത പുറത്തുവന്നിരിക്കുന്നത്.
