സിനിമയുടെ റിലീസിനോടനുബന്ധിച്ച് അണിയറപ്രവര്‍ത്തകര്‍ പലതരം പ്രചാരണ പരിപാടികള്‍ സംഘടിപ്പിക്കാറുണ്ട്. ഭൂരിഭാഗവും സോഷ്യല്‍മീഡിയ വഴിയായിരിക്കും.
ജയസൂര്യയുടെ പുതിയ ചിത്രമായ പ്രേതത്തിന്റെ പ്രചാരണത്തിനായി വ്യത്യസ്തമായ ഒരു വീഡിയോ തയ്യാറാക്കിയിരിക്കുകയാണ് സംവിധായകന്‍ രഞ്ജിത് ശങ്കറും കൂട്ടരും.
ഒരു മെന്റലിസ്റ്റായ ജോണ്‍ ഡോണ്‍ബോസ്‌കോ എന്ന കഥാപാത്രമായാണ് ജയസൂര്യ പ്രേതത്തില്‍ എത്തുന്നത്. അതുകൊണ്ട് തന്നെ കേരളത്തിലെ പ്രശസ്ത മെന്റലിസ്റ്റായ ആദിയെത്തന്നെയാണ് ‘പ്രേതം ടീം’ കൂട്ടുപിടിച്ചിരിക്കുന്നത്. ജയസൂര്യക്കും രഞ്ജിത് ശങ്കറിനുമൊപ്പം ഒരു കോഫീ ഷോപ്പിലിരിക്കുന്ന ആദിയാണ് വീഡിയോയില്‍. ജയസൂര്യയുടെ ആദ്യ പ്രണയം കണ്ടുപിടിക്കാന്‍ ശ്രമിക്കുന്നതാണ് ദൃശ്യത്തിലുള്ളത്.
ആദി നെറ്റിയില്‍ തൊടുമ്പോള്‍ ജയസൂര്യ ഷോക്കേറ്റപോലെ ഞെട്ടി പിന്നോട്ടുമാറുന്നതും കാണാം. ജയസൂര്യയാണ് വീഡിയോ ഫേസ്ബുക്കിലൂടെ ഷെയര്‍ ചെയ്തിരിക്കുന്നത്. ഈ മാസം 12നാണ് പ്രേതം തിയേറ്ററുകളിലെത്തുന്നത്.
