കൊച്ചി: തൃക്കാക്കരയിലെ ഇടതു സ്ഥാനാർത്ഥി ഡോ. ജോ ജോസഫിന്റെ പേരിൽ വന്ന അശ്ലീല വീഡിയോ എൽഡിഎഫിന്റെ നാടകമെന്ന് സുരേഷ് ഗോപി എംപി. എൽഡിഎഫ് എന്തു പണിയും ചെയ്യും. അതൊക്കെ നാട്ടുകാർക്ക് അറിയാവുന്നതാണെന്നും സുരേഷ് ഗോപി പറഞ്ഞു. തൃക്കാക്കരയിൽ ബിജെപി സ്ഥാനാർത്ഥി എഎൻ രാധാകൃഷ്ണന്റെ തെരഞ്ഞെടുപ്പ് പ്രചാരണത്തിനിടെയാണ് സുരേഷ് ഗോപിയുടെ പ്രതികരണം.
പി സി ജോർജിന്റെ അറസ്റ്റ് ഒക്കെ കോടതി നോക്കിക്കോളും. മറ്റ് അറസ്റ്റുകളെക്കുറിച്ച് മാധ്യമങ്ങൾക്ക് അറിയണ്ടേ. ആഭ്യന്തരമന്ത്രിയോട് പോയി ചോദിക്കൂ. ഇതെല്ലാം മുഖ്യമന്ത്രിയോട് പോയി ചോദിച്ചാൽ മതിയെന്നും സുരേഷ് ഗോപി പറഞ്ഞു.
പി സി ജോർജിന്റെ വിഷയമെല്ലാം വിശദമായി ചർച്ച ചെയ്യേണ്ടത് കോടതിയിലാണ്. കോടതി അത് നോക്കിക്കോളും. പൊലീസ് കോടതിയെ വഹിക്കാതിരുന്നാൽ മതിയെന്നും സുരേഷ് ഗോപി അഭിപ്രായപ്പെട്ടു.
അതിനിടെ, ജോ ജോസഫിന്റെ പേരിൽ വന്ന വ്യാജ അശ്ലീല വീഡിയോയുമായി ബന്ധപ്പെട്ട് രണ്ടുപേരെ കൂടി പൊലീസ് കസ്റ്റഡിയിലെടുത്തു. കണ്ണൂർ കേളകം സ്വദേശി അബ്ദുൾ റഹ്മാൻ, കളമശ്ശേരി സ്വദേശി ഷിബു എന്നിവരാണ് പിടിയിലായത്.
