ചെന്നൈ: ഇന്ത്യയ്‌ക്കെതിരായ ഒന്നാം ക്രിക്കറ്റ് ടെസ്റ്റിലൂടെ ഇംഗ്ലണ്ടിനായി 100 ടെസ്റ്റ് മത്സരം കളിക്കുന്ന പതിനഞ്ചാമത്തെ താരം എന്ന റെക്കോഡ് സ്വന്തമാക്കിയ ഇംഗ്ലണ്ട് ക്യാപ്റ്റന്‍ ജോ റൂട്ട് മറ്റൊരു അപൂര്‍വ നേട്ടത്തിനു കൂടെ അർഹനായി. ടെസ്റ്റിന്റെ ഒന്നാം ദിവസമായ ഇന്ന് സെഞ്ചുറി നേടിയ ജോ റൂട്ട് 100-ാം ടെസ്റ്റില്‍ സെഞ്ചുറിയിലെത്തുന്ന മൂന്നാമത്തെ ഇംഗ്ലണ്ട് താരമെന്ന റെക്കോർഡ് ആണിപ്പോൾ സ്വന്തമാക്കിയിരിക്കുന്നത്. കോളിന്‍ കൗഡ്രെ, അലക് സ്റ്റുവര്‍ട്ട് എന്നിവരാണ് നൂറാം ടെസ്റ്റില്‍ സെഞ്ചുറി നേടിയ മറ്റ് ഇംഗ്ലീഷ് താരങ്ങള്‍.
അതേസമയം അന്താരാഷ്ട്ര ക്രിക്കറ്റില്‍ 100-ാം ടെസ്റ്റില്‍ സെഞ്ചുറിയിലെത്തുന്ന ഒമ്പതാമത്തെ താരമാണ് റൂട്ട്. കോളിന്‍ കൗഡ്രെയേയും അലക് സ്റ്റുവര്‍ട്ടിനെയും കൂടാതെ ജാവേദ് മിയാന്‍ദാദ് (പാകിസ്താന്‍), ഗോള്‍ഡന്‍ ഗ്രീനിഡ്ജ് (വെസ്റ്റിന്‍ഡീസ്), ഇന്‍സമാം ഉള്‍ ഹഖ് (പാകിസ്താന്‍), റിക്കി പോണ്ടിങ് (ഓസ്‌ട്രേലിയ), ഗ്രെയിം സ്മിത്ത് (ദക്ഷിണാഫ്രിക്ക), ഹഷിം അംല (ദക്ഷിണാഫ്രിക്ക) എന്നിവരാണ് റൂട്ടിന് മുമ്പ് ഈ നേട്ടത്തിലെത്തിയവര്‍. അതേസമയം 100-ാം ടെസ്റ്റിലെ രണ്ട് ഇന്നിങ്‌സിലും സെഞ്ചുറി നേടിയ ഏക താരമെന്ന നേട്ടം റിക്കി പോണ്ടിങ്ങിനാണ്.
