മലയാളത്തിന്റെ പ്രിയതാരം കലാഭവന്‍മണിയുടെ അന്‍പതാം ജന്മദിനത്തില്‍ മാഷപ്പ് വീഡിയോയുമായി ലിന്റോ കുര്യന്‍. മണിയുടെ ജീവിതത്തിലെ ആദ്യകാലഘട്ടം മുതല്‍ ജീവിതാവസാനം വരെയുള്ള നിമിഷങ്ങള്‍ ലിന്റോ വീഡിയോയിലൂടെ അവതരിപ്പിക്കുന്നുണ്ട്.
ആറു മിനിറ്റ് ദൈര്‍ഘ്യമുള്ള വീഡിയോ മണിയുടെ ആരാധകരെ മാത്രമല്ല മലയാള സിനിമാ പ്രേമികളെയും കണ്ണീരിലാഴ്ത്തുന്നതാണ്. മലയാളത്തിന്റെ എക്കാലത്തെയും വലിയ നഷ്ടമായിരുന്നു മണിയുടെ വിടവാങ്ങല്‍.
രസകരമായ ട്രോള്‍ വീഡിയോകള്‍, മാഷപ്പ് വീഡിയോകള്‍ എന്നിവ സൃഷ്ടിക്കുന്ന എഡിറ്റര്‍ ആണ് ലിന്റോ. താരങ്ങളുടെ ജന്മദിനത്തില്‍ സ്‌പെഷല്‍ മാഷപ്പ് വീഡിയോകള്‍ പുറത്തിറക്കിയാണ് ലിന്റോ കുര്യന്‍ സിനിമാ പ്രേമികള്‍ക്കിടയില്‍ പ്രശസ്തനായത്.
മോഹന്‍ലാല്‍, മമ്മൂട്ടി, ജയസൂര്യ, ദിലീപ് തുടങ്ങി മലയാളത്തിലെ ഒട്ടു മിക്ക താരങ്ങളുടെയും ജന്മദിന സ്‌പെഷ്യല്‍ മാഷപ്പ് വീഡിയോകള്‍ വൈറല്‍ ആയിരുന്നു. തന്റെ ജന്മദിനത്തിന് ലിന്റോ ചെയ്ത ജന്മദിന സ്‌പെഷല്‍ മാഷപ്പ് കണ്ട നടന്‍ ജയസൂര്യ ലിന്റോയെ സിനിമയിലേക്ക് ക്ഷണിച്ചിരുന്നു.
