കാണ്‍പൂര്‍: സ്ത്രീകള്‍ക്കും കുട്ടികള്‍ക്കുമെതിരായ അതിക്രമങ്ങള്‍ ദിനം പ്രതി വര്‍ധിക്കുന്ന സാഹചര്യത്തില്‍ ഉത്തര്‍പ്രദേശില്‍ നിന്നുള്ള ഒരു വീഡിയോ സമൂഹമാധ്യമങ്ങളില്‍ വൈറലാവുകയാണ്. കാണ്‍പൂരിലെ ബിത്തൂരിലാണ് സംഭവം.
സ്‌കൂള്‍ വിദ്യാര്‍ത്ഥിനികളോട് മോശമായി പെരുമാറിയ യുവാവിനെ പരസ്യമായി ഷൂസ് ഊരിതല്ലുന്ന പൊലീസുകാരിയുടെ വീഡിയോ ആണ് വൈറലായി കൈയ്യടി നേടുന്നത്.
നയീം ഖാന്‍ എന്ന യുവാവാണ് സ്‌കൂള്‍ വിദ്യാര്‍ത്ഥിനികളോട് അപമര്യാദയായി പെരുമാറിയത്. തുടര്‍ന്ന് വിദ്യാര്‍ത്ഥിനികള്‍ പൊലീസിനോട് പരാതി പറഞ്ഞു. ഉടന്‍ തന്നെ വനിതാ കോണ്‍സ്റ്റബിള്‍ ചഞ്ചല്‍ ചൗരസിയ സ്ഥലത്തെത്തി യുവാവിനെ പിടികൂടുകയും പരസ്യമായി തന്നെ ഇയാളെ കൈകാര്യം ചെയ്യുകയുമായിരുന്നു.
ആദ്യം യുവാവിന്റെ മുഖത്തടിച്ച ചഞ്ചല്‍ പിന്നീട് ഷൂ ഊരി മര്‍ദ്ദിക്കുകയായിരുന്നു. ഈ വീഡിയോ സമീപത്തുള്ളവര്‍ സോഷ്യല്‍ മീഡിയയില്‍ പങ്കുവച്ചതോടെ ഈ പൊലീസുകാരിക്ക് അഭിനന്ദന പ്രവാഹമാണ്.
