ന്യൂഡല്‍ഹി: കേന്ദ്രമന്ത്രി അമിത് ഷാ പറഞ്ഞ ദുരൂഹമരണം തന്റെ സഹോദരന്റേതെങ്കില്‍ അന്വേഷിക്കട്ടെയെന്ന് കാരാട്ട് റസാഖ്. സഹോദരന്റെ മരണത്തില്‍ കുടുംബത്തിന് സംശയങ്ങളൊന്നുമില്ല. രണ്ടു വര്‍ഷം മുമ്പുള്ള മരണത്തെക്കുറിച്ച് ഇപ്പോള്‍ പറയുന്നത് രാഷ്ട്രീയ ലക്ഷ്യത്തോടെയാണ്. അമിത് ഷായുടെ കയ്യില്‍ തെളിവുണ്ടെങ്കില്‍ വെളിപ്പെടുത്തട്ടേയെന്നും അന്വേഷണത്തിന് കേന്ദ്ര ഏജന്‍സികള്‍ക്ക് നിര്‍ദേശം നല്‍കട്ടെയെന്നും റസാഖ് പറഞ്ഞു.
സ്വര്‍ണ്ണക്കടത്തിലും ഡോളര്‍ കടത്തിലും പിണറായിയോടുള്ള അമിത് ഷായുടെ ശംഖുമുഖം ചോദ്യങ്ങളില്‍ ഏറ്റവും ചര്‍ച്ചയാകുന്നത് സാക്ഷിയുടെ മരണത്തെക്കുറിച്ചുള്ള ചോദ്യമാണ്. സ്വര്‍ണ്ണക്കടത്ത് വിവാദത്തില്‍ പ്രധാനസാക്ഷിയായ ഒരാളുടെ ദുരൂഹമരണത്തെ കുറിച്ച് അന്വേഷിച്ചിരുന്നോ എന്നായിരുന്നു ആഭ്യന്തരമന്ത്രി അമിത് ഷായുടെ ചോദ്യം.
