കാര്‍ത്തി നായകനാകുന്ന പുതിയ ആക്ഷന്‍ ത്രില്ലര്‍ വരുന്നു. ഭാഗ്യരാജ് കണ്ണന്‍ തിരക്കഥയെഴുതി സംവിധാനം ചെയ്യുന്ന സുല്‍ത്താന്‍ ചിത്രത്തിന്റെ ട്രെയിലര്‍ പുറത്തിറങ്ങി. ആക്ഷനും ഡാന്‍സും റൊമാന്‍സും ചേര്‍ത്തൊരുക്കിയ ചിത്രമാണ് സുല്‍ത്താന്‍ എന്നാണ് ട്രെയിലര്‍ നല്‍കുന്ന സൂചന.
രശ്മിക മന്ദാനയാണ് ചിത്രത്തിലെ നായിക. തെലുങ്ക് ചലച്ചിത്രങ്ങളിലൂടെ സുപരിചിതയായ രശ്മികയുടെ ആദ്യ തമിഴ് ചിത്രം കൂടിയാണിത്. ലാല്‍, ഹരീഷ് പേരടി, നെപ്പോളിയന്‍, യോഗി ബാബു എന്നിവരാണ് മറ്റ് പ്രധാന താരങ്ങള്‍. സത്യന്‍ സൂര്യന്‍ ഛായാഗ്രഹണം നിര്‍വഹിക്കുന്ന സുല്‍ത്താന്റെ എഡിറ്റര്‍ റൂബെന്‍ ആണ്.
വിവേക്- മെര്‍വിന്‍ കൂട്ടുകെട്ടാണ് സുല്‍ത്താന്റെ സംഗീതം ഒരുക്കുന്നത്. ഡ്രീം വാരിയര്‍ പിക്‌ചേഴ്‌സിന്റെ ബാനറില്‍ എസ്.ആര്‍ പ്രകാശ് ബാബുവും എസ്.ആര്‍ പ്രഭുവും നിര്‍മിക്കുന്ന തമിഴ് ചിത്രം അടുത്ത മാസം രണ്ടിന് തിയേറ്ററുകളിലൂടെ പുറത്തിറങ്ങും.
തമിഴ്നാട് തെരഞ്ഞെടുപ്പ് പ്രമാണിച്ച് സുല്‍ത്താന്റെ റിലീസ് നീട്ടിവെക്കുമെന്ന് റിപ്പോര്‍ട്ടുകളുണ്ടായിരുന്നെങ്കിലും സിനിമ ഏപ്രിലില്‍ തന്നെ പ്രദര്‍ശനത്തിനെത്തുമെന്ന് നിര്‍മാതാക്കള്‍ നേരത്തെ അറിയിച്ചിരുന്നു.
