മുംബൈ: വരാന്‍ പോകുന്ന ലോകകപ്പില്‍ ഇന്ത്യന്‍ ടീമില്‍ ഒരവസരം കിട്ടുമോ എന്നു കാത്തിരിക്കുകയാണ് ഇന്ത്യന്‍ ക്രിക്കറ്റ് താരങ്ങളില്‍ ഭൂരിഭാഗം പേരും. ഇപ്പോളിതാ ആ ടീമില്‍ തനിക്കൊരു അവസരം കിട്ടുമോ എന്നു ചോദിച്ച് എത്തിയിരിക്കുകയാണ് മറ്റൊരു താരം. പക്ഷേ അത് ക്രിക്കറ്റ് ലോകത്തെ താരം അല്ലെന്നു മാത്രം ഇന്ത്യന്‍ സിനിമയിലെ സൂപ്പര്‍ താരമാണ് അവസരം ചോദിച്ചെത്തിയ കക്ഷി. മറ്റാരും അല്ല ബോളിവുഡ് താരം കത്രീന കൈഫ് ആണ് അത്.
ബാറ്റ് ചെയ്യുന്ന വീഡിയോ പങ്കുവെച്ചാണ് കത്രീന കൈഫ് അവസരം ചോദിച്ചത്. ഭാരത് എന്ന സിനിമയുടെ പാക്ക് അപ്പ് കഴിഞ്ഞ് ക്രിക്കറ്റ് കളിക്കുന്ന വീഡിയോ താരം ഇന്‍സ്റ്റാഗ്രാം പേജിലാണ് പങ്കുവെച്ചിരിക്കുന്നത്. ക്യാപ്റ്റനോട് സംസാരിച്ച് എനിക്ക് ടീമില്‍ അവസരം നല്‍കാമോയെന്ന് അനുഷ്‌ക ശര്‍മയോട് തമാശരൂപേണ കത്രീന ചോദിച്ചിട്ടുമുണ്ട്.
