കൊച്ചി: ഐ.എസ്.എല്‍. ഫുട്‌ബോളിലെ നിര്‍ണായക മത്സരത്തിനായി കേരള ബ്ലാസ്റ്റേഴ്സ് കൊച്ചിയില്‍ ഇന്നിറങ്ങുന്നു. എഫ്.സി. ഗോവയെയാണ് മഞ്ഞപ്പട ഇന്നു നേരിടാന്‍ ഒരുങ്ങുന്നത്. ഗോവയില്‍ അഞ്ചു ഗോള്‍ വാങ്ങി മടങ്ങിയ ബ്ലാസ്റ്റേഴ്‌സിന് ഇന്നത്തെ മത്സരം നിര്‍ണ്ണായകമാണ്. ഗോവക്കെതിരെ ജയിച്ചാല്‍ ഐ.എസ്.എല്‍. പോയിന്റ് പട്ടികയില്‍ ബ്ലാസ്റ്റേഴ്സ് ആദ്യ നാലിലെത്തുന്നതാണ്.
ബ്ലാസ്റ്റേഴ്സ് കോച്ച് ഡേവിഡ് ജെയിംസിന്റെ പിന്തുണയില്‍ നിറഞ്ഞ ആത്മവിശ്വാസത്തോടെയാണ് മഞ്ഞപ്പട ഇന്ന് മത്സരക്കളത്തിലേയ്ക്ക് ഇറങ്ങുന്നത്. ഡല്‍ഹിക്കെതിരേ ഹാട്രിക്കോടെയും മുംബൈക്കെതിരേ വിവാദഗോളോടെയും ബ്ലാസ്റ്റേഴ്‌സിനെ രക്ഷിച്ച ഇയാന്‍ ഹ്യൂമും, ഗോളിയായി റെച്ചുബ്കയും പ്രതിരോധത്തില്‍ വെസ് ബ്രൗണും മധ്യനിരയില്‍ പെക്കുസണും ഇറങ്ങുമ്പോള്‍ ആരാധകര്‍ക്ക് പ്രതീക്ഷയേറെയാണ്. പരിക്കുമൂലം കെസിറോണ്‍ കിസിറ്റോ കളിക്കില്ലെങ്കില്‍ മുന്നേറ്റത്തില്‍ ഹ്യൂമിനൊപ്പം സിഫ്‌നിയോസിനെയായിരിക്കും ഇറക്കുക. കൊച്ചി ജവഹര്‍ലാല്‍ നെഹ്രു അന്താരാഷ്ട്ര സ്റ്റേഡിയത്തില്‍ രാത്രി എട്ടുമണിക്കാണ് കിക്കോഫ്.
