തിരുവനന്തപുരം: വരാനിരിക്കുന്ന പാര്‍ലമെന്റ് തിരഞ്ഞെടുപ്പില്‍ സംസ്ഥാനത്തെ ഒരു സീറ്റിലെങ്കിലും വിജയം ഉറപ്പാക്കണമെന്ന ബിജെപി ദേശീയ അധ്യക്ഷന്‍ അമിത് ഷായുടെ മോഹം വിലപ്പോകില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍.
ബിജെപി കേരളത്തില്‍ ഒരിക്കലും നേട്ടമുണ്ടാക്കില്ല. തിരഞ്ഞെടുപ്പില്‍ വിജയിക്കാന്‍ ബിജെപി കോര്‍പ്പറേറ്റുകളില്‍ നിന്നും പിരിച്ച കോടികള്‍ കേരളത്തില്‍ ഒഴുക്കുകയാണ്. ബിജെപിയുടെ നീക്കങ്ങളെ കോണ്‍ഗ്രസ് കണ്ടില്ലെന്നു നടിക്കുന്നുവെന്നും കോടിയേരി പറഞ്ഞു.
കേരളത്തിനു കേന്ദ്രമന്ത്രിസഭയില്‍ പ്രാതിനിധ്യം ലഭിക്കണമെങ്കില്‍ അടുത്ത തെരഞ്ഞെടുപ്പില്‍ സംസ്ഥാനത്തെ ഒരു സീറ്റിലെങ്കിലും വിജയം ഉറപ്പാക്കണമെന്നാണ് അമിത് ഷാ കഴിഞ്ഞ ദിവസം പറഞ്ഞത്. എന്തുവില കൊടുത്തും കേരളത്തില്‍നിന്നു പാര്‍ലമെന്റിലേക്ക് ഒരാളെ എത്തിക്കാന്‍ കഴിയണമെന്നും അദ്ദേഹം എറണാകുളം ഗസ്റ്റ് ഹൗസില്‍ ബിജെപി കോര്‍ കമ്മിറ്റി യോഗത്തില്‍ ആവശ്യപ്പെട്ടു.
