തിരുവനന്തപുരം: ലീഗുമായി പ്രശ്‌നങ്ങളൊന്നുമില്ലെന്ന് കെപിസിസി അധ്യക്ഷന്‍ കെ സുധാകരന്‍.എല്ലാകാലത്തും സൗഹൃദത്തിലാണ് പോയിട്ടുള്ളതെന്നും കെ സുധാകരന്‍ പറഞ്ഞു.ലോക്‌സഭ സീറ്റ് ചര്‍ച്ചകള്‍ യൂഡിഎഫ് ഭംഗിയായി പൂര്‍ത്തിയാക്കും. കോണ്‍ഗ്രസ് സ്ഥാനാര്‍ഥി നിര്‍ണയിച്ച ചര്‍ച്ച ഒരു ദിവസം കൊണ്ട് പൂര്‍ത്തിയാകുന്ന ഒന്നല്ല. ഇന്നത്തെ യോഗത്തില്‍ തെരഞ്ഞെടുപ്പ് തന്ത്രങ്ങളാണ് പ്രധാന അജണ്ടയെന്നും സിറ്റിങ് എംപിമാര്‍ മത്സരിക്കുന്ന കാര്യത്തില്‍ ആലോചിച്ചു തീരുമാനമെടുക്കുമെന്നും അദ്ദേഹം വ്യക്തമാക്കി.
അതേസമയം, ലോക്‌സഭാ തെരഞ്ഞെടുപ്പില്‍ മൂന്നു സീറ്റ് ചോദിക്കാന്‍ ലീഗിന് യോഗ്യത ഉണ്ടെന്ന് കോണ്‍?ഗ്രസ് നേതാവും എം.പിയുമായ കെ. മുരളീധരന്‍ പ്രതികരിച്ചു. അങ്ങനെ മുന്‍പ് കൊടുത്ത ചരിത്രമുണ്ട്. മൂന്നാം സീറ്റ് ആവശ്യം കോണ്‍ഗ്രസിന്റെ പരിഗണനയിലാണ്. ഇക്കാര്യം ഹൈക്കമാന്റുമായി ആലോചിച്ച് ഉചിതമായി തീരുമാനമെടുക്കും.
കെപിസിസി അധ്യക്ഷന്‍ കെ. സുധാകരന്‍ കണ്ണൂര്‍ പാര്‍ലമെന്റ് മണ്ഡലത്തില്‍ മത്സരിക്കുന്നില്ലെന്ന വിവരം മുസ്ലിം ലീഗിന് അറിയില്ലെന്ന് ലീഗ് കണ്ണൂര്‍ ജില്ലാപ്രസിഡന്റ് അബ്ദുല്‍ കരീം ചേലേരി കഴിഞ്ഞ ദിവസം പറഞ്ഞിരുന്നു. കണ്ണൂര്‍ ബാഫക്കി തങ്ങള്‍ മന്ദിരത്തില്‍ നടത്തിയ വാര്‍ത്താസമ്മേളനത്തില്‍ സംസാരിക്കവേയാണ് അദ്ദേഹം ഇക്കാര്യം പറഞ്ഞത്. ഇക്കാര്യം കെ. സുധാകരന്‍ ഇതുവരെ പരസ്യമായി പറഞ്ഞിട്ടില്ലെന്നാണ് അറിവ്. അതുകൊണ്ടു തന്നെ പാര്‍ട്ടിക്ക് ഇക്കാര്യത്തില്‍ വിവരമൊന്നുമില്ലെന്നും അദ്ദേഹം വ്യക്തമാക്കി.
