കുവൈറ്റ് സിറ്റി: ഫറാ ഹംസ അക്ബര്‍ എന്ന യുവതിയെ കാറില്‍ തട്ടിക്കൊണ്ടുപോയി കൊലപ്പെടുത്തിയ കേസില്‍ സ്വദേശി യുവാവിനെതിരേ കൊലപാതകക്കുറ്റം ചുമത്തി കുവൈറ്റ് പബ്ലിക് പ്രൊസിക്യൂഷന്‍. കൊലപാതകത്തിനെതിരേ കുവൈറ്റില്‍ ശക്തമായ പ്രതിഷേധം ഉയരുന്നതിനിടയിലാണ് പ്രതിക്കെതിരെ കൊലക്കുറ്റവും അതോടൊപ്പം തട്ടിക്കൊണ്ടുപോവലും ആരോപിച്ച് കേസെടുത്തിരിക്കുന്നത്. പ്രതിയെ വധശിക്ഷയ്ക്ക് വിധിക്കണമെന്ന് ഫറയുടെ അഭിഭാഷകയായ സഹോദരി ദനാ അക്ബര്‍ ആവശ്യപ്പെട്ടു.
കഴിഞ്ഞ ചൊവ്വാഴ്ചയായിരുന്നു ഫറാ അക്ബര്‍ എന്ന യുവതിയെ ഒരു സ്വദേശി യുവാവ് വാഹനത്തില്‍ തട്ടിക്കൊണ്ടുപോയി കൊലപ്പെടുത്തിയ ശേഷം മുബാറക് അല്‍ കബീറിലെ അദന്‍ ആശുപത്രി കവാടത്തില്‍ ഉപേക്ഷിച്ചത്. യുവതി ഇയാളുടെ വിവാഹാഭ്യര്‍ഥന നിരസിച്ചതാണ് കൊലപാതകത്തിന് കാരണമെന്നാണ് കരുതപ്പെടുന്നത്.
