ഇന്ത്യന്‍ ക്രിക്കറ്റ് ഇതിഹാസം സുനില്‍ ഗാവസ്‌ക്കറുടെ പേര് ലെസ്റ്റര്‍ ക്രിക്കറ്റ് മൈതാനത്തിന് നല്‍കി അധികൃതര്‍. ലോക ക്രിക്കറ്റിലെ തന്നെ മികച്ച താരങ്ങളില്‍ ഒരാളായ ഗാവസ്‌ക്കറോടുള്ള ആദരസൂചകമായാണ് ഈ നടപടി.
പുതിയ നടപടിയിൽ സന്തോഷമറിയിച്ച് ഗാവസ്‌ക്കര്‍ സോഷ്യല്‍ മീഡിയയില്‍ പോസ്റ്റ് ചെയ്യുകയും ചെയ്തിട്ടുണ്ട്. ടെന്നീസ് ബോള്‍ ക്രിക്കറ്റ് നാളുകളിലും രാജ്യാന്തര ക്രിക്കറ്റിലും തനിക്കൊപ്പം കളിച്ചവര്‍ക്കും കുടുംബത്തിനും ആരാധകര്‍ക്കുമെല്ലാം നന്ദിയറിയിക്കുന്നതായും ഗാവസ്‌ക്കര്‍ കുറിച്ചു.
ടെസ്റ്റ് ചരിത്രത്തില്‍ 10,000 റണ്‍സ് തികയ്ക്കുന്ന ആദ്യ താരമായ ഗാവസ്‌ക്കര്‍, ടെസ്റ്റില്‍ ഏറ്റവും കൂടുതല്‍ സെഞ്ചുറികളെന്ന (34) റെക്കോഡ് ഏറെക്കാലം തന്റെ പേരിലാക്കിയിരുന്നു.
