വീണാ വീജയന്റെ എക്സാലോജിക്കിനെതിരായ കേന്ദ്ര അന്വേഷണത്തില്‍ പ്രതികരിക്കാതെ മന്ത്രി പി രാജീവ്. മാത്യു കുഴല്‍നാടന്‍ ആദ്യം ഞങ്ങളുടെ ചോദ്യങ്ങള്‍ക്ക് മറുപടി പറയട്ടെ, അതിന് ശേഷം പുതിയ ആരോപണങ്ങള്‍ക്ക് മറുപടിയെന്നും പി രാജീവ് പറഞ്ഞു. സംസ്ഥാനത്ത് ഏകാധിപത്യ പ്രവണതയില്ലെന്നും മറ്റിടങ്ങളില്‍ അതുണ്ടെന്നും മന്ത്രി പറഞ്ഞു. ഭരണഘടനാ സ്ഥാപനങ്ങളെ കേന്ദ്രം ദുര്‍ബലപ്പെടുത്തുന്നു. നിയമസഭയില്‍ ബില്‍ പാസാക്കി അയച്ചാല്‍ പിന്നീട് വിശദീകരണം തേടേണ്ടതില്ല. അഭിപ്രായ വ്യത്യാസമുണ്ടായാല്‍ നിയമനിര്‍മാണ സഭയിലേക്ക് തിരിച്ചയക്കാം. ഇതാണ് ഭരണഘടന പറയുന്നതെന്ന് മന്ത്രി പി രാജീവ് വ്യക്തമാക്കി.
മുഖ്യമന്ത്രിയുടെ മകള്‍ വീണാ വിജയന്റെ കമ്പനിയായ എക്‌സാലോജിക്കിനെതിരെയുള്ള കേന്ദ്ര സര്‍ക്കാരിന്റെ അന്വേഷണത്തില്‍ പ്രതികരിക്കാതെ മന്ത്രി പിഎ മുഹമ്മദ് റിയാസ്. അന്വേഷണവുമായി ബന്ധപ്പെട്ടുള്ള മാധ്യമങ്ങളുടെ ചോദ്യങ്ങളോട് പ്രതികരിക്കാതെ റിയാസ് ഒഴിഞ്ഞുമാറി. കേന്ദ്ര അന്വേഷണം അറിഞ്ഞിട്ടില്ലെന്നായിരുന്നു എല്‍ഡിഎഫ് കണ്‍വീനര്‍ ഇപി ജയരാജന്റെ പ്രതികരണം. എക്സാലോജികിനെതിരായ അന്വേഷണം അറിയില്ല. നോക്കിയിട്ട് പറയാമെന്നും ഇപി തിരുവനന്തപുരത്ത് പ്രതികരിച്ചു.
