സോഷ്യൽ നെറ്റ്‌വർക്കിങ് സൈറ്റായ ലിങ്ക്ഡ്ഇന്നിനും ഫേസ്ബുക്കിനെപ്പോലെ തന്നെ പണി കിട്ടിയതായി റിപ്പോർട്ടുകൾ വരുന്നു. 500 മില്യൺ ലിങ്ക്ഡ്ഇൻ യൂസർമാരുടെ വിവരങ്ങളാണ് ഹാക്കർ ഫോറത്തിൽ വില്പനയ്ക്കുള്ളത്. സൈബർ ന്യൂസ് എന്ന വെബ് പോർട്ടലാണ് ഇത് സംബന്ധിച്ച് റിപ്പോർട്ട് ചെയ്തത്.
ലിങ്ക്ഡ് ഇൻ ഐഡികൾ, പേരുകൾ, ഇമെയിൽ, ഫോൺ നമ്പറുകൾ, ലിങ്ക്ഡ് ഇന്നിലേക്കും മറ്റ് സോഷ്യൽ മീഡിയ പ്രൊഫൈലിലേക്കുമുള്ള ലിങ്കുകൾ, പ്രൊഫഷണൽ ശീർഷകങ്ങൾ എന്നിവ ലീക്കായ വിവരങ്ങളിൽ ഉൾപ്പെടുന്നു. എന്നാൽ തങ്ങളുടെ യൂസർമാരുടെ വിവരങ്ങൾ ചോർന്നിട്ടില്ലെന്നും പ്ലാറ്റ്‌ഫോം ഉപയോഗിക്കുന്ന ആർക്കും കാണാവുന്ന മെമ്പർ പ്രൊഫൈൽ ഡാറ്റ മാത്രമാണ് ഹാക്കർമാർക്ക് ലഭിച്ചതെന്നും ലിങ്ക്ഡ് ഇൻ വിശദീകരിച്ചു.
സ്വകാര്യ അംഗങ്ങളുടെ വിവരങ്ങളൊന്നും തന്നെ ഹാക്കർമാർ പുറത്തുവിട്ട ഡാറ്റയിൽ പെട്ടിട്ടില്ലെന്നും മൈക്രോസോഫ്റ്റിന് കീഴിലുള്ള കമ്പനി വ്യക്തമാക്കി.
