ന്യൂഡല്‍ഹി:ലോക്സഭാ തെരഞ്ഞെടുപ്പില്‍ ബി.ജെ.പി നയിക്കുന്ന എന്‍.ഡി.എ മുന്നണി കേരളത്തില്‍ അക്കൗണ്ട് തുറക്കുമെന്ന് ടൈംസ് നൗ ചാനല്‍ ഇലക്ഷന്‍ സര്‍വേ.
2019 ജനുവരിയില്‍ നടത്തിയ വി.എം.ആര്‍- ടൈംസ് നൗ സര്‍വേയിലാണ് ലോക്സഭാ തെരഞ്ഞെടുപ്പില്‍ കേരളത്തില്‍ എന്‍.ഡി.എ ആദ്യമായി അക്കൗണ്ട് തുറക്കുമെന്ന് പ്രവചിച്ചിരിക്കുന്നത് . കേരളത്തില്‍ ഇരുപത് സീറ്റുകളില്‍ 16 എണ്ണം യു.ഡി.എഫ് നേടും. ശേഷിക്കുന്ന മൂന്നുസീറ്റ് എല്‍.ഡി.എഫും ഒരു സീറ്റ് എന്‍.ഡി.എയും നേടുമെന്നുമാണ് പ്രവചനം.
ലോക്‌സഭ തെരഞ്ഞെടുപ്പിലെ മറ്റു സംസ്ഥാനങ്ങളുടെ ഭാവിയും ടൈംസ് നൗ പ്രവചിച്ചിട്ടുണ്ട്.
തമിഴ്‌നാട്- 39 ലോക്സഭാ സീറ്റുകളുള്ള തമിഴ്‌നാട്ടില്‍ കോണ്‍ഗ്രസ് നയിക്കുന്ന യു.പി.എ സഖ്യം 35 സീറ്റുകള്‍ നേടുമെന്ന് സര്‍വേ പറയുന്നു. ബി.ജെ.പി നയിക്കുന്ന എന്‍.ഡി.എ സഖ്യം സീറ്റുകള്‍ നേടാനിടയില്ല. എ.ഐ.എ.ഡി.എം.കെ 4 സീറ്റുകളില്‍ വിജയിക്കുമെന്നും സര്‍വേ.
കര്‍ണാടക-28 സീറ്റുകളുള്ള കര്‍ണാടകത്തില്‍ കോണ്‍ഗ്രസും ബി.ജെ.പിയും 14 സീറ്റുകള്‍ വീതം നേടുമെന്ന് സര്‍വേ പറയുന്നു.
ആന്ധ്രാപ്രദേശ്- 25 സീറ്റുകളുള്ള ആന്ധ്രയില്‍ ജഗ്മോഹന്‍ റെഡ്ഡിയുടെ വൈ.എസ്.ആര്‍.കോണ്‍ഗ്രസ് 23 സീറ്റുകളും നേടുമെന്ന് സര്‍വേ. തെലുങ്ക് ദേശം പാര്‍ട്ടി വെറും 2 സീറ്റില്‍ ഒതുങ്ങും.
തെലങ്കാന-ആകെയുള്ള 17 സീറ്റുകളില്‍ 10 എണ്ണത്തില്‍ തെലങ്കാന രാഷ്ട്ര സമിതി (ടി.ആര്‍.എസ്) വിജയിക്കുമെന്ന് സര്‍വേ പറയുന്നു. കോണ്‍ഗ്രസ് 5 ഉം ബി.ജെ.പിയും മറ്റുള്ളവരും ഓരോ സീറ്റുകള്‍ വീതം നേടുമെന്നും സര്‍വേ.
നേരത്തെ എ.ബി.പി ന്യൂസ്, ഇന്ത്യാ ടുഡേ, റിപ്പബ്‌ളിക് ടിവി തുടങ്ങിയ ചാനലുകള്‍ കേരളത്തിലെ തെരഞ്ഞെടുപ്പ് ഭാവി പ്രവചിച്ചിരുന്നു. ആ സര്‍വേകള്‍ കേരളത്തില്‍ ഇത്തവണയും ബി.ജെ.പിയോ എന്‍.ഡി.എയോ ഒരുസീറ്റും നേടില്ലെന്നാണ് പ്രവചിച്ചത്. യു.ഡി.എഫ് 16ഉം, എല്‍.ഡി.എഫ് നാലും സീറ്റുകള്‍ നേടുമെന്നായിരുന്നു ഈ സര്‍വേകള്‍ പ്രവചിച്ചത്.
