ലോകേഷ് കനകരാജ് എന്ന സംവിധായകന്റെ നിരൂപക പ്രശംസ പിടിച്ച് പറ്റിയ സിനിമകളിലൊന്നായിരുന്നു കൈതി. ലോകേഷ് സിനിമാറ്റിക് യൂണിവേഴ്സിലെ(എല്‍സിയു) ഈ ആദ്യ ചിത്രം റിലീസായിട്ട് നാല് വര്‍ഷം തികയുകയാണ്. ഇതിനോടകം തന്നെ കൈതി രണ്ടാം ഭാഗത്തെക്കുറിച്ചുള്ള അപ്‌ഡേറ്റുകള്‍ക്കും കാത്തിരിക്കുകയാണ് ആരാധകര്‍. കൈതിക്ക് രണ്ടാം ഭാഗം ഉണ്ടാകുമെന്ന് 2022ല്‍ ലോകേഷ് കനകരാജ് ഔദ്യോഗികമായി അറിയിച്ചിരുന്നു. എന്നാല്‍ പിന്നീട് കൂടുതല്‍ അപ്‌ഡേറ്റുകള്‍ ഒന്നും തന്നെ വന്നിരുന്നില്ല. ഇപ്പോഴിതാ കൈതിയുടെ നാലാം വാര്‍ഷികത്തില്‍ രണ്ടാം ഭാഗം ഉടന്‍ ഉണ്ടാകുമെന്ന് അറിയിച്ചിരിക്കുകയാണ് നിര്‍മാതാക്കളായ ഡ്രീം വാരിയേഴ്‌സ് പിക്‌ചേഴ്‌സ്.
കൈതിയുടെ മേക്കിംഗ് വീഡിയോയ്ക്ക് ഒപ്പമാണ് രണ്ടാം ഭാഗത്തിന്റെ വരവ് ഡ്രീം വാരിയേഴ്‌സ് പിക്‌ചേഴ്‌സ് അറിയിച്ചിരിക്കുന്നത്. ലൈഫ് ടൈം സെറ്റില്‍മെന്റിനായി കാത്തിരിക്കുക എന്നാണ് നിര്‍മാതാക്കള്‍ വീഡിയോയ്ക്ക് ഒപ്പം പറഞ്ഞിരിക്കുന്നത്. ഒപ്പം ദില്ലി തിരിച്ചുവരുന്നു എന്ന് വീഡിയോയില്‍ ഉള്‍ക്കൊള്ളിച്ചിട്ടുണ്ട്. 2019 ഒക്ടോബര്‍ 25നാണ് ചിത്രം റിലീസായത്. നടന്‍ കാര്‍ത്തി ‘ദില്ലി’ എന്ന വേഷത്തില്‍ എത്തി കസറിയ ചിത്രം ആക്ഷന്‍ ത്രില്ലര്‍ ജോണറില്‍ ആയിരുന്നു എത്തിയത്.
ലോകേഷ് യൂണിവേഴ്‌സില്‍ ഇനി വരാനിരിക്കുന്നത് കൈതി 2, റോളക്‌സ്- എ സ്റ്റാര്‍ഡ് എലോണ്‍, വിക്രം 2 എന്നിവയാണേന്ന് സംവിധായകന്‍ അടുത്തിടെ പറഞ്ഞിരുന്നു. ഇതില്‍ വിക്രം 2 എല്‍സിയുവിലെ അവസാന ചിത്രമാക്കാന്‍ പ്ലാനുണ്ടെന്നും ലോകേഷ് വ്യക്തമാക്കി. എന്തായാലും കൈതി 2 അപ്‌ഡേഷന്‍ വന്നതോടെ ഏറെ ആവേശത്തോടെ കാത്തിരിക്കുകയാണ് ആരാധകര്‍. വിജയ് നായകനായ ലിയോ ആണ് ലോകേഷിന്റേതായി ഏറ്റവും അടുത്തിറങ്ങിയ ചിത്രം.
