മൂന്ന് ദിവസം മുൻപ് വാങ്ങിയ ആഢംബര കാർ കത്തി നശിച്ചു . അമേരിക്കയിലെ പെൻ‌സിൽ‌വാനിയയിലാണ് സംഭവം. മക്ലാരൻ 765 എൽടി ആഡംബര സ്പോർട്സ് കാറാണ് കത്തിനശിച്ചത്. വളരെ കുറച്ചെണ്ണം മാത്രം നിർമ്മിക്കപ്പെടുന്ന ലിമിറ്റഡ് എഡിഷൻ മോഡലാണിത്.
2.66 കോടി രൂപ ചെലവിൽ മൂന്ന് ദിവസം മുൻപ് വാങ്ങിയ കാർ കേവലം 160 കിലോമീറ്റർ മാത്രമാണ് ഓടിയിരുന്നത് . അപകടം നടക്കുമ്പോൾ കാർ പെട്രോൾ പമ്പിലായിരുന്നുവെന്ന് അഗ്നിശമന വകുപ്പ് അറിയിച്ചു. മക്ലാരൻ ഉടമ അബദ്ധത്തിൽ എക്‌സ്‌ഹോസ്റ്റിലേക്ക് ഇന്ധനം ഒഴിച്ചതാണ് കാരണമെന്നാണ് ആദ്യ നിഗമനം.
തീപിടിത്തത്തിന്റെ കാരണം കൃത്യമായി കണ്ടെത്താനായിട്ടില്ല .രണ്ട് മണിക്കൂറിലധികം ശ്രമിച്ചാണ് അഗ്നിശമന വകുപ്പ് തീ അണച്ചത്. അപ്പോഴേക്കും കാർ ലോഹക്കൂമ്പാരമായി മാറിയിരുന്നു . സംഭവത്തിൽ ആർക്കും പരിക്കേറ്റിട്ടില്ല.
