മലപ്പുറം: പെരുമ്പടപ്പില്‍ ഗുഡ്‌സ് ഓട്ടോ ഇടിച്ച് യുവാവ് മരിച്ച സംഭവത്തില്‍ ഡ്രൈവര്‍ പിടിയില്‍. തൊടുപുഴ കല്ലൂര് കൂടിയകത്ത് ആന്റോ എന്ന യുവാവാണ് പിടിയിലായത്. ശനിയാഴ്ച പുലര്‍ച്ചെയാണ് പെരുമ്പടപ്പ് സ്വദേശി അമലിനെ മരിച്ച നിലയില്‍ റോഡില്‍ കണ്ടെത്തിയത്.
അമലിനെ ഇടിച്ച ശേഷം ആന്റോ വാഹനം നിര്‍ത്താതെ പോകുകയായിരുന്നു. മണിക്കൂറുകള്‍ക്ക് ശേഷം പൊലീസ് എത്തിയാണ് അമലിനെ ആശുപത്രിയില്‍ എത്തിച്ചത്. അപ്പോഴേക്കും യുവാവ് മരിച്ചിരുന്നു.
തുടര്‍ന്ന് സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ പിടികൂടിയത്. ഭയംകൊണ്ടാണ് വിവരം പൊലീസില്‍ അറിയിക്കാതിരുന്നതെന്നും അമലിനെ ആശുപത്രിയില്‍ എത്തിക്കാതിരുന്നതെന്നും ആന്റോ പൊലീസിനോട് പറഞ്ഞു.
