ഇന്ത്യയൊട്ടാകെ ആരാധകരുള്ള നടനാണ് ബോളിവുഡിന്റെ സ്‌റ്റൈലിഷ് താരം രണ്‍ബീര്‍ കപൂര്‍. മലയാളിയായ മാളവിക മോഹനന്റെയും പ്രിയപ്പെട്ട താരമാണ് രണ്‍ബീര്‍. തന്റെ പ്രിയപ്പെട്ട യുവനടനൊപ്പം സിനിമ ചെയ്യാന്‍ അവസരം ലഭിച്ചതിലെ സന്തോഷം പങ്കുവക്കുകയാണ് നടി ഇപ്പോള്‍.
‘ഒടുവില്‍ എന്റെ പ്രിയതാരത്തിനൊപ്പം സ്‌ക്രീന്‍ പങ്കിടാന്‍ അവസരം ലഭിച്ചിരിക്കുന്നു,’ എന്ന് രണ്‍ബീറിനോടൊത്ത് നില്‍ക്കുന്ന ചിത്രത്തിനൊപ്പം മാളവിക കുറിച്ചു.
അടുത്തിടെ രണ്‍ബീര്‍ കപൂറിനൊപ്പം മാളവിക ഒരു പരസ്യ ചിത്രത്തില്‍ അഭിനയിച്ചിരുന്നു. ഇതിന് പിന്നാലെയാണ് ബോളിവുഡ് യൂത്ത് ഐക്കണിനൊപ്പം ഒരു സിനിമ ചെയ്യാന്‍ ഒരുങ്ങുകയാണെന്ന വിശേഷവും നടി പങ്കുവെച്ചത്. നടിയുടെ ട്വീറ്റിന് പിന്നാലെ, മാളവികയുടെ തെലുങ്ക് ചിത്രത്തിനായും കാത്തിരിക്കുന്നുവെന്ന് ടോളിവുഡ് സിനിമാപ്രേക്ഷകര്‍ പ്രതികരിച്ചു. രണ്‍ബീറിനൊപ്പമുള്ള സിനിമ മികച്ചതാകട്ടെ എന്നും ആരാധകര്‍ കുറിച്ചു.
2013ല്‍ പട്ടം പോലെ എന്ന ചിത്രത്തില്‍ ദുല്‍ഖര്‍ സല്‍മാന്റെ നായികയായാണ് മാളവിക അരങ്ങേറ്റം കുറിച്ചത്. ബോളിവുഡിലും മലയാളസിനിമയിലും ഛായാഗ്രഹകനായിരുന്ന കെ.യു മോഹനന്റെ മകളാണ് മാളവിക മോഹനന്‍.
ഹിന്ദിയില്‍ മജീദ് മജിദിയുടെ ബിയോണ്ട് ദി ക്ലൗഡ്സ് എന്ന ചിത്രത്തില്‍ കേന്ദ്രകഥാപാത്രത്തെ അവതരിപ്പിച്ച് നടി മികച്ച പ്രകടനം കാഴ്ചവച്ചു. ചിത്രത്തില്‍ ഇഷാന്‍ ഖട്ടറിന്റെ സഹോദരിയുടെ വേഷമായിരുന്നു താരത്തിന്റേത്. വിജയ് നായകനായ മാസ്റ്റര്‍ എന്ന ചിത്രത്തിലും മാളവിക ശ്രദ്ധേയ വേഷം ചെയ്തു.
