അടുത്ത മാസം തിയേറ്ററുകളില്‍ എത്താന്‍ തയ്യാറെടുക്കുന്ന മമ്മൂട്ടി ചിത്രം പേരന്‍പ് ചൈനയിലും റിലീസ് ചെയ്യുമെന്ന് സൂചന. തങ്കമീന്‍കള്‍ എന്ന ചിത്രത്തിലൂടെ ദേശീയ പുരസ്‌കാരം സ്വന്തമാക്കിയ റാമിന്റെ സംവിധാനത്തില്‍ ഒരുങ്ങിയ ചിത്രം ആരാധകരില്‍ ഏറെ പ്രതീക്ഷ ഉണര്‍ത്തുന്നു.
ചിത്രം ഷൂട്ടിംഗ് പൂര്‍ത്തിയാക്കി ഒരു വര്‍ഷത്തിലേറേയായെങ്കിലും വിവിധ ചലച്ചിത്രോല്‍സവങ്ങളിലെ പ്രദര്‍ശനത്തിനു ശേഷമാണ് റിലീസിന് തയാറെടുക്കുന്നത്. ദേശീയ പുരസ്‌കാര ജേതാവും മമ്മൂട്ടിയും ഒന്നിക്കുമ്പോള്‍ ഉള്ള പ്രേക്ഷക പ്രതീക്ഷയും ചെറുതല്ല.
അതേസമയം, ചൈനയില്‍ ചിത്രം റിലീസ് ചെയ്യുന്നതിനുള്ള ചര്‍ച്ചകള്‍ അവസാന ഘട്ടത്തിലാണെന്നാണ് കോളിവുഡില്‍ നിന്ന് ലഭിക്കുന്ന വിവരം. സബ് ടൈറ്റിലുകളോടെയോ മൊഴിമാറ്റിയോ ആകും ചിത്രം ചൈനയില്‍ എത്തിക്കുക. യു/എ സര്‍ട്ടിഫിക്കറ്റ് ലഭിച്ച ചിത്രം 2 മണിക്കൂര്‍ 27 മിനുറ്റ് ദൈര്‍ഘ്യമുള്ളതാണ്.
