ഓണ മത്സരത്തിന് മമ്മൂട്ടിച്ചിത്രവുമുണ്ടെന്ന് ഏറെക്കുറെ ഉറപ്പായി. ജോണി ആന്റണി സംവിധാനം ചെയ്യുന്ന തോപ്പില്‍ ജോപ്പനാണ് മമ്മൂട്ടിയുടെ ഓണച്ചിത്രം. ഓണത്തിന് ഒരാഴ്ച മുന്‍പ് സെപ്തംബര്‍ ഏഴിന് ചിത്രം റിലീസ് ചെയ്യാനാണ് തീരുമാനം.
സെപ്തംബര്‍ ഏഴ് മമ്മൂട്ടിയുടെ ജന്മദിനമാണ്. ഒരുപാട് കാലങ്ങള്‍ക്ക് ശേഷമാണ് സെപ്തംബര്‍ ഏഴിന് ഒരു മമ്മൂട്ടിച്ചിത്രം റിലീസ് ചെയ്യുന്നത്. പാട്ടും, ഡാന്‍സും, ഫൈറ്റും, കോമഡിയുമെല്ലാം ചേരുംപടി ചേര്‍ത്തൊരുക്കുന്ന തോപ്പില്‍ ജോപ്പന്‍ മമ്മൂട്ടിയുടെ ആരാധകര്‍ക്ക് ആഘോഷിക്കാനുള്ള വകയൊരുക്കുമെന്നാണ് ആദ്യ സൂചന.
മമ്മൂട്ടിച്ചിത്രത്തിനൊപ്പം മോഹന്‍ലാലിന്റെ പ്രിയദര്‍ശന്‍ ചിത്രമായ ഒപ്പം, സുന്ദര്‍ദാസ് ബെന്നി പി. നായരമ്പലം ടീമൊരുക്കുന്ന ദിലീപ് ചിത്രം വെല്‍ക്കം ടു സെന്‍ട്രല്‍ ജയില്‍, ജീത്തുജോസഫിന്റെ പൃഥ്വിരാജ് ചിത്രം ഊഴം, ദുല്‍ഖര്‍ സല്‍മാനെ നായകനാക്കി അമല്‍നീരദ് സംവിധാനം ചെയ്യുന്ന പേരിടാത്ത ചിത്രം എന്നിവയാണ് ഓണത്തിന് റിലീസ് ചെയ്യുന്ന മറ്റ് ചിത്രങ്ങള്‍.
