പൃഥ്വിരാജിനൊപ്പം വരവറിയിച്ച് മംമ്താ മോഹന്‍ദാസ്. 100 ഡേയ്‌സ് ഓഫ് ലൗവിന് ശേഷം ജെനൂസ് മുഹമ്മദ് സംവിധാനം ചെയ്യുന്ന 9 ഒരു സയന്‍സ് ഫിക്ഷന്‍ ചിത്രം കൂടിയാണ്. പൃഥ്വിരാജ് പ്രൊഡക്ഷന്‍സും സോണി പിക്‌ചേര്‍സും ചേര്‍ന്നാണ് ചിത്രത്തിന്റെ നിര്‍മാണം. ഓഗസ്റ്റ് സിനിമാസില്‍ നിന്നും വിട്ട് പൃഥ്വിരാജ് ഭാര്യ സുപ്രിയയ്‌ക്കൊപ്പം ചെയ്യുന്ന ആദ്യ ചിത്രം കൂടിയാണിത്.
9 ല്‍ ആനിയായി മംമ്ത എത്തുന്ന വിവരം പൃഥ്വി തന്നെയാണ് ഫെയ്‌സ്ബുക്കിലൂടെ അറിയിച്ചിരിക്കുന്നത്. ഗോദ എന്ന ചിത്രത്തില്‍ ടൊവിനോ തോമസിന്റെ നായികയായി എത്തിയ വാമിഖ ഗബ്ബിയും ചിത്രത്തില്‍ പ്രധാന വേഷം കൈകാര്യം ചെയ്യുന്നുണ്ട്.
9
ഒരു ശാസ്ത്രജ്ഞനായാണ് ചിത്രത്തില്‍ പൃഥ്വി പ്രത്യക്ഷപ്പെടുന്നത്. ചിത്രത്തിന്റെ ഫസ്റ്റ് ലുക്കും പുറത്തു വിട്ടിരുന്നു. ഹൊറര്‍ മൂഡ് നല്‍കുന്ന ഫിക്ഷന്‍ ചിത്രമാണ് ഫസ്റ്റ്‌ലുക്ക് സൂചിപ്പിക്കുന്നത്. മലയാളത്തില്‍ ഇതുവരെ കണ്ടിട്ടില്ലാത്തൊരു കാഴ്ച്ചയായിരിക്കും 9 എന്ന് താരം മുന്‍പ് പറഞ്ഞിരുന്നു.
ചിത്രത്തിന്റെ ചിത്രീകരണം ഹിമാലയത്തില്‍ പുരോഗമിക്കുകയാണിപ്പോള്‍. കോട്ടയം രാമപുരത്തായിരുന്നു 9 ന്റെ ആദ്യ ഷൂട്ടിംഗ്. അഭിനന്ദ് രാമാനുജമാണ് ഛായാഗ്രഹണം. ശേഖര്‍ മേനോന്‍ പശ്ചാത്തല സംഗീതവും ഷാന്‍ റഹ്മാന്‍ സംഗീതവും സമീറ സനീഷ് വസ്ത്രാലങ്കാരവും നിര്‍വ്വഹിക്കും.
9
ഫോര്‍വീല്‍ ഡ്രൈവ് വിന്റേജ് ജീപ്പിനൊപ്പം ഒരു ടെന്റും ഹിമാലയവും നിറഞ്ഞു നില്‍ക്കുന്ന ചിത്രം നേരത്തെ പൃഥ്വി ആരാധകര്‍ക്കായി പങ്കുവെച്ചിരുന്നു. ചിത്രത്തിനൊപ്പം തിരശ്ശീല ഒരു കെട്ടുകഥ പോലെ തോന്നുമ്പോള്‍ എന്ന അടിക്കുറിപ്പും ഉണ്ടായിരുന്നു.
