കൊച്ചി: വാങ്ങിയ പണവും സ്വര്‍ണവും തിരികെ ചോദിച്ചതിനെ തുടര്‍ന്നുണ്ടായ വാക്കേറ്റത്തിനിടെ യുവാവ് സ്ത്രീയെ കുത്തിപ്പരിക്കേല്‍പ്പിച്ചു. കൊച്ചി പെരുമ്പളം വെസ്റ്റ് അമ്പലക്കടവ് ജെട്ടിക്ക് സമീപം പാറക്കാട്ട് അമ്പിളിക്കാണ് കുത്തേറ്റത്. കഴിഞ്ഞ ആഴ്ചയാണ് ഇവര്‍ ഗള്‍ഫില്‍നിന്നു നാട്ടിലെത്തിയത്. പ്രതി ചേര്‍ത്തല പെരുമ്പളം സ്വദേശി റാനിഷിനെ കടവന്ത്ര പൊലീസ് അറസ്റ്റു ചെയ്തു.
ചൊവ്വാഴ്ച രാവിലെയായിരുന്നു സംഭവം. അമ്പിളി വിദേശത്തേക്കു പോകുന്നതിനു മുമ്പ് 80,000 രൂപയും സ്വര്‍ണമാലയും റാനിഷിന് നല്‍കിയിരുന്നു. ഇതു തിരികെ ചോദിച്ചതുമായി ബന്ധപ്പെട്ട തര്‍ക്കമാണ് ആക്രമണത്തില്‍ കലാശിച്ചത്.
റാനിഷിന്റെ പരിചയക്കാരിയുടെ വീട്ടിലെത്തിയ അമ്പിളിയുമായി സംസാരിച്ചു കൊണ്ടിരിക്കുന്നതിനിടെ റാനിഷ് കത്തിയെടുത്തു വീശുകയായിരുന്നു. കുത്തു തടയാനുള്ള ശ്രമത്തിനിടെയാണ് കൈത്തണ്ടയിലും വിരലുകള്‍ക്കും മുറിവേറ്റത്.
