മലയാളത്തിലെ ലേഡി സൂപ്പര്‍ സ്റ്റാര്‍ മഞ്ജു വാര്യരുടെയും സഹോദരന്റെയും ഒരു പഴയകാല ചിത്രം ഏറ്റെടുത്ത് ആരാധകര്‍. സാമൂഹ്യ മാധ്യമത്തില്‍ മഞ്ജു വാര്യരും മധു വാര്യരും പോസ്റ്റ് ചെയ്ത ചിത്രത്തിന്റെ അടിക്കുറിപ്പാണ് ശ്രദ്ധേയമായിരിക്കുന്നത്.
‘ഇരിപ്പ് കണ്ടാല്‍ ഒരു വന്‍ തമ്മില്‍തല്ല് കഴിഞ്ഞതാണെന്നന്ന് പറയുകയേയില്ല അല്ലേ ചേട്ടാ’ എന്ന് കുറിച്ചുകൊണ്ടാണ് മഞ്ജു ചിത്രം പങ്കുവെച്ചിരിക്കുന്നത്. അതേ സമയം, ‘ലളിതവും സുന്ദരവുമായ ത്രോ ബാക്ക്’എന്നായിരുന്നു നടനും സംവിധായകനുമായ മഞ്ജുവിന്റെ സഹോദരന്‍ മധു വാര്യരുടെ കുറിപ്പ്.
മധു വാര്യര്‍ സംവിധാനം ചെയ്ത് മഞ്ജു വാര്യര്‍ പ്രധാന കഥാപാത്രമായെത്തുന്ന പുതിയ ചിത്രത്തിന്റെ തലക്കെട്ടാണ് ‘ലളിതം സുന്ദരം’ എന്നത് ഈ ത്രോബാക്ക് ചിത്രത്തിന്റെ ആകര്‍ഷണീയത കൂട്ടുന്നു.
മഞ്ജു വാര്യര്‍ പ്രൊഡക്ഷന്‍സിന്റെ ബാനറില്‍ ഒരുങ്ങുന്ന ചിത്രത്തില്‍ ബിജു മേനോനാണ് മറ്റൊരു പ്രധാന വേഷം ചെയ്യുന്നത്. കൂടാതെ, ദിലീഷ് പോത്തന്‍, സൈജു കുറുപ്പ്, സെറീന വഹാബ്, ദീപ്തി സതി തുടങ്ങി നിരവധി താരങ്ങളും ചിത്രത്തിന്റെ ഭാഗമാകുന്നുണ്ട്. മരക്കാര്‍ അറബിക്കടലിന്റെ സിംഹം, ജാക്ക് ആന്‍ഡ് ജില്‍, കയറ്റം, ചതുര്‍മുഖം, ദി പ്രീസ്റ്റ്, ലളിതം സുന്ദരം, പടവെട്ട്, വെള്ളരിക്കാ പട്ടണം തുടങ്ങി നിരവധി സിനിമകളാണ് മഞ്ജുവിന്റേതായി പുറത്തിറങ്ങാനിരിക്കുന്നത്.
