മിലാന്‍:നാപോളിക്കായി ഏറ്റവും കൂടുതല്‍ സീരി എ ഗോളുകള്‍ നേടിയ താരങ്ങളുടെ പട്ടികയില്‍ മുന്നിലെത്തി ബെല്‍ജിയം താരം ഡ്രീസ് മെര്‍ടന്‍സ്. അര്‍ജന്റീന ഇതിഹാസം ഡീഗോ മറഡോണയെ മറികടന്നാണ് താരം മുന്നേറിയിരിക്കുന്നത്.
ക്ലബിന്റെ ഇതിഹാസ താരമായ മറഡോണ 1984 മുതല്‍ 1991 വരെ കളിച്ച് സീരി എയില്‍ ടീമിന് 81 ഗോളുകളാണ് നേടിയത്. ഈ നേട്ടമാണ് 2013ല്‍ നാപോളിയിലെത്തിയ മെര്‍ടന്‍സ് 82 ഗോളുകളാക്കി ഉയര്‍ത്തി മറികടന്നത്.
സീരി എ പോരാട്ടത്തില്‍ രണ്ടാം സ്ഥാനത്തുള്ള നാപോളി കഴിഞ്ഞ ദിവസം കഗ്ലിയാരിയെ 2-1ന് കീഴടക്കിയിരുന്നു. ഈ പോരാട്ടത്തില്‍ ഒരു ഗോള്‍ നേടിയാണ് മെര്‍ടന്‍സ് മറഡോണയെ പിന്നിലാക്കിയത്. ഒരു ഗോളിന് പിന്നില്‍ നിന്ന ശേഷം 85ാം മിനുട്ടില്‍ മെര്‍ടെന്‍സ് ഹെഡ്ഡറിലൂടെ നേടിയ ഗോളില്‍ നാപോളി സമനില പിടിക്കുകയായിരുന്നു. 90ാം മിനുട്ടില്‍ വിജയ ഗോളും അവര്‍ വലയില്‍ കുരുക്കി. .
