മാഡ്രിഡ്: ചാമ്പ്യന്‍സ് ലീഗില്‍ റയല്‍ മാഡ്രിഡിന് സമനില . ഗ്രൂപ്പ് എഫില്‍ നടന്ന മത്സരത്തില്‍ ബൊറുസിയ ഡോര്‍ട്ട്മുണ്ടാണ് റയലിനെ സമനിലയില്‍ പിടിച്ചത്. ഇരുടീമുകളും രണ്ടു ഗോളുകള്‍ വീതം നേടി. സമനിലയോടെ ബൊറൂസിയ ഗ്രൂപ്പില്‍ ഒന്നാം സ്ഥാനം ഉറപ്പിച്ചു.
രണ്ടു ഗോളുകള്‍ക്കു മുന്നിട്ടുനിന്നശേഷമാണ് റയല്‍ സമനില വഴങ്ങിയത്. 28, 53 മിനിറ്റുകളില്‍ കരിം ബെന്‍സേമയാണ് റയലിന്റെ ഗോളുകള്‍ നേടിയത്. എന്നാല്‍ 60-ാം മിനിറ്റില്‍ ഔബമെയാംഗും കളി അവസാനിക്കാന്‍ രണ്ടു മിനിറ്റ് ബാക്കിനില്‍ക്കെ മാര്‍കോ റൂയിസും നേടിയ ഗോളുകളുടെ മികവില്‍ ബൊറൂസിയ സമനില പിടിച്ചെടുക്കുകയായിരുന്നു.
സമനിലയോടെ ചാമ്പ്യന്‍സ് ലീഗ് ഗ്രൂപ്പ് സ്റ്റേജില്‍ ഏറ്റവുമധികം ഗോളുകള്‍ നേടുന്ന ടീം എന്ന ഖ്യാതി ബൊറൂസിയ സ്വന്തമാക്കി.
