ജയസൂര്യ നായകനായ പുതിയ ചിത്രം ക്യാപ്റ്റൻ പ്രദർശനത്തിനെത്തിയിരിക്കുകയാണ്. ഫുട്ബോൾ പ്രേമികളുടെ ആരാധന കഥാപാത്രമായിരുന്ന വി.പി സത്യന്റെ ജീവിതകഥ പറയുന്ന ചിത്രത്തിന്റെ അഭിപ്രായം അറിയിച്ചിരിക്കുകയാണ് സംവിധായകൻ മിഥുൻ മാനുവൽ.
മികച്ച സിനിമയാണ് ക്യാപ്റ്റനെന്നും ജയസൂര്യ എന്ന നടൻ വീണ്ടും വിസ്മയിപ്പിക്കുന്നുവെന്നും സിനിമ കണ്ട ശേഷം മിഥുൻ മാനുവൽ അഭിപ്രായപ്പെട്ടു. ജയസൂര്യയെ നായകനാക്കി പ്രജേഷ് സെന്‍ സംവിധാനം ചെയ്ത ചിത്രത്തിൽ അനുസിത്താരയാണ് നായിക.
ഫെയ്‌സ് ബുക്ക് പോസ്റ്റിന്റെ പൂർണ്ണ രൂപം . . .
ക്യാപ്റ്റൻ കണ്ടു.. (വിസ്മയയിലെ പ്രിവ്യു ഷോ).. കുട്ടിക്കാലത്തു ഒരിക്കൽ സ്കൂൾ അവധി കിട്ടിയത് കേരളം സന്തോഷ് ട്രോഫി നേടിയതിന്റെ പിറ്റേന്നായിരുന്നു.. അന്ന് റേഡിയോ കമ്മന്ററിയിൽ കേരളാ ക്യാപ്റ്റൻ വി പി സത്യന്റെ പേര് കമന്റേറ്റർ തൊണ്ട പൊട്ടുമാറു അലറി വിളിച്ചത് ഇന്നലെയെന്നത് പോലെ ഓർക്കുന്നു..
അന്ന് മനസ്സിൽ പതിഞ്ഞ പേരാണ് സത്യൻ..നായകൻ സത്യൻ.. ക്യാപ്റ്റൻ സത്യൻ.. അയാളുടെ നമ്മളറിയാത്ത ജീവിതം ആണ് ഈ സിനിമ.. തിരസ്‌ക്കാരങ്ങളുടെ, അവഗണനകളുടെ നൊമ്പരങ്ങളുടെ കണ്ണീർപ്പാടങ്ങളിൽ പുഞ്ചിരി വിരിയിക്കാൻ പടപൊരുതിയ ഒരു വീരനായകന്റെ കഥ, ഒരു അച്ഛന്റെ കഥ, ഒരു ഭർത്താവിന്റെ കഥ..
തീയറ്റർ വിട്ടിറങ്ങുമ്പോൾ സത്യൻ നമ്മുടെ മനസ്സിലെ തീരാത്ത വിങ്ങലായി മാറും, തീർച്ച. ജയസൂര്യ എന്ന നടൻ വീണ്ടും വിസ്മയിപ്പിക്കുന്നു..ഇത് പോലെ അതിരുകളില്ലാത്ത അഭിനയസാധ്യതകൾ ഉള്ള കഥാപാത്രങ്ങൾ ഇനിയും നിങ്ങളെ തേടി വരും.. ഉറപ്പു.. സത്യന്റെ അനിതയായി അനു സിത്താരയും നമ്മുടെ മനസ്സിലേയ്ക്ക് നടന്നു കയറുന്നു..
പ്രജേഷ് സെൻ – നിങ്ങൾക്ക് അഭിമാനിക്കാൻ വകയുണ്ട് തുടക്കക്കാരാ, നല്ലൊരു സിനിമ അണിയിച്ചു ഒരുക്കിയതിൽ… Goodwill entertainments – നിങ്ങൾക്കും അഭിനന്ദനങ്ങൾ.. സത്യനെ വീണ്ടും ഓർക്കാൻ ചുക്കാൻ പിടിച്ചതിന്.. 🙂 പിന്നെ, ഈ സിനിമയുടെ അണിയറയിൽ പ്രവർത്തിച്ച എല്ലാവർക്കും ഒരു ഫുട്ബാൾ പ്രേമിയുടെ, ഒരു സത്യൻ ആരാധകന്റെ സ്നേഹം, ഇഷ്ടം..
