കങ്കണ റണൗട്ട് സംവിധാനം ചെയ്ത് നായികയായി അഭിനയിക്കുന്നു എന്ന കാരണത്താൽ വാർത്തകളിൽ നിറഞ്ഞ ചിത്രമാണ് ‘എമർജൻസി’. ഇന്ദിരാ ഗാന്ധിയായാണ് കങ്കണ ചിത്രത്തിലെത്തുന്നത്. സിനിമയിലെ മറ്റൊരു പ്രധാനകഥാപാത്രത്തിന്റെ കാരക്റ്റർ പോസ്റ്റർ ശ്രദ്ധ നേടുകയാണിപ്പോൾ. ഫീൽഡ് മാർഷൽ പദവി ആദ്യമായി നേടിയ മുൻ ഇന്ത്യൻ സൈനികനായ സാം മനേക് ഷായുടെ വേഷത്തിലുള്ള മിലിന്ദ് സോമന്റെ പോസ്റ്ററാണിത്.
കങ്കണയ്ക്കൊപ്പം ജോലി ചെയ്യാനായതിൽ സന്തോഷമുണ്ടെന്ന് മിലിന്ദ് സോമൻ പ്രതികരിച്ചു. കങ്കണയുടെ ക്വീൻ, തനു വെഡ്സ് മനു പോലുള്ള ചിത്രങ്ങൾ ഒരുപാട് ആസ്വദിച്ചിട്ടുണ്ട്. കങ്കണയുടെ സംവിധാനത്തിൽ അഭിനയിക്കുന്നതിനെ പ്രതീക്ഷയോടെയാണ് ഉറ്റുനോക്കുന്നത്. ഫീൽഡ് മാർഷൽ സാം മനേക് ഷായുടെ വേഷം ലഭിച്ചതിൽ അഭിമാനമുണ്ടെന്നും വലിയ ഉത്തരവാദിത്വമാണിതെന്നും അദ്ദേഹം കൂട്ടിച്ചേർത്തു.
