മോഹന്‍ലാലിനെ നായകനാക്കി മേജര്‍ രവിയുടെ പട്ടാളചിത്രം വരുന്നു. ഇന്ത്യപാകിസ്ഥാന്‍ യുദ്ധ സമയത്തെ സംഭവവികാസങ്ങളെ ആസ്പദമാക്കിയൊരുക്കുന്ന ചിത്രത്തിന് ‘1971 വാര്‍ ‘ എന്നാണ് പേരിട്ടിരിക്കുന്നത്.
ഇന്ത്യപാക് യുദ്ധ സമയത്ത് രാജസ്ഥാന്‍ മേഖലയില്‍ നടന്ന സംഭവമാണ് ചിത്രത്തിന് ആസ്പദമാകുന്നത്. യഥാര്‍ഥത്തില്‍ നടന്ന ഒരു സംഭവമാണ് ചിത്രമാകുന്നത്.
രണ്ട് ഉയര്‍ന്ന പട്ടാള ഉദ്യോഗസ്ഥരുടെ ജീവിതവും അവരുടെ ബന്ധവുമൊക്കെ പറയുന്നതാണ് സിനിമ. മരുഭൂമിയിലാകും ചിത്രീകരണം.
മേജര്‍ രവിയുടെ തന്നെയാണ് തിരക്കഥ. റെഡ് റോസ്‌ക്രിയേഷന്‍സിന്റെ ബാനറില്‍ ഹനീഫ് മുഹമ്മദാണ് ചിത്രം നിര്‍മ്മിക്കുന്നത്.
ബാഹുബലി താരം റാണ ദഗുപതിയാകും മോഹന്‍ലാലിനൊപ്പം പ്രധാനവേഷത്തിലെത്തുക.
കീര്‍ത്തിചക്ര, കുരുക്ഷേത്ര, കാണ്ഡഹാര്‍, കര്‍മ്മയോദ്ധ സിനിമകള്‍ക്ക് ശേഷമാണ് മേജര്‍ രവിയും മോഹന്‍ലാലും വീണ്ടും ഒരുമിക്കുന്നത്. ചിത്രത്തില്‍ മോഹന്‍ലാല്‍ എത്തുന്നത് മൂന്ന് ഗെറ്റപ്പിലാണ്.
മേജര്‍ മഹാദേവന്‍ തന്നെയാണ് ചിത്രത്തിലെ മോഹന്‍ലാലിന്റെ മുഖ്യ കഥാപാത്രത്തിന്റെ പേര്.
മേജര്‍ മഹാദേവന്റെ അച്ഛന്‍ മേജര്‍ സഹദേവന്‍ ആയും മറ്റൊരു ഗെറ്റപ്പിലും മോഹന്‍ലാല്‍ എത്തുന്നുണ്ട്.
അടുത്ത നവംബറില്‍ രാജസ്ഥാന്‍, പഞ്ചാബ് സെക്ടറില്‍ സിനിമയുടെ ചിത്രീകരണം ആരംഭിക്കും.
