മോഹന്‍ലാല്‍ സംവിധായകനാകുന്ന ചിത്രമാണ് ബറോസ്. ചിത്രത്തിന്റെ ഷൂട്ടിംഗ് അടുത്ത വര്‍ഷം മാര്‍ച്ചില്‍ ഗോവയില്‍ ആരംഭിക്കുമെന്നാണ് പുതിയ റിപ്പോര്‍ട്ട്. ബറോസ് എന്ന ടൈറ്റില്‍ കഥാപാത്രത്തെ മോഹന്‍ലാല്‍ തന്നെയാണ് അവതരിപ്പിക്കുന്നത്. ബറോസിലെ നായികയെയും സംഗീതസംവിധായകനെയും നാളെ കൊച്ചിയിലെ ഗോകുലം പാര്‍ക്കില്‍ നടക്കുന്ന ചടങ്ങില്‍ ഔദ്യോഗികമായി പ്രഖ്യാപിക്കും. ബറോസിലെ ഗാനങ്ങള്‍ക്ക് സംഗീതമൊരുക്കുന്നത് പതിമൂന്നുകാരനായ ലിഡിയന്‍ നാദസ്വരമാണ്.ലോസേഞ്ചല്‍സില്‍ നിന്നുള്ള പതിന്നാലുകാരിയാണ് നായികയാകുന്നത്. ഇരുവരും ചടങ്ങില്‍ സംബന്ധിക്കും.
കാലിഫോര്‍ണിയയില്‍ നടന്ന സി.ബി.എസ് ഗ്ലോബല്‍ ടാലന്റ് ഷോയില്‍ ഒന്നാം സമ്മാനം നേടിയാണ് ലിഡിയന്‍ ലോക ശ്രദ്ധ ആകര്‍ഷിച്ചത്. ഇതിനോടകം തന്നെ ലിഡിയന്‍ ബറോസിലെ ഗാനങ്ങള്‍ ചിട്ടപ്പെടുത്തി കഴിഞ്ഞെന്നാണ് അറിയുന്നത്. തമിഴ് സംഗീത സംവിധായകനായ വര്‍ഷന്‍ സതീഷിന്റെ മകനാണ് ലിഡിയന്‍. വാസ്‌കോഡ ഗാമയുടെ നിധി സൂക്ഷിക്കുന്ന ബറോസിന്റെ കഥ പോര്‍ച്ചുഗീസ് പശ്ചാത്തലത്തിലാണ് ഒരുങ്ങുന്നത്.
കെ.യു. മോഹനനാണ് ക്യാമറ കൈകാര്യം ചെയ്യുന്നത്.ഇന്ത്യയിലെ ആദ്യ ത്രിമാന ചിത്രത്തിന്റെ സംവിധായകനായ ജിജോ ആണ് ബറോസിന്റെ തിരക്കഥയെഴുതുന്നത്.ബറോസിന്റെ താരനിരയില്‍ മലയാളികള്‍ ആരും ഉണ്ടാകില്ലെന്ന് മോഹന്‍ലാല്‍ കഴിഞ്ഞ ദിവസം ഒരു അഭിമുഖത്തില്‍ വ്യക്തമാക്കിയിരുന്നു. പ്രശസ്ത സ്പാനിഷ് അഭിനേതാക്കളായ പാസ് വെഗയും റാഫേല്‍ അമര്‍ഗോയും പ്രധാന വേഷങ്ങളിലെത്തുന്നുണ്ട്.ഷൂട്ടിംഗിന് മുന്‍പായുള്ള ജോലികള്‍ ഇപ്പോള്‍ കൊച്ചിയിലെ നവോദയ സ്റ്റുഡിയോയില്‍ പുരോഗിക്കുകയാണ്.
