മോഹന്‍ലാലിനെ നായകനാക്കി ജിബു ജേക്കബ് സംവിധാനം ചെയ്യുന്ന മുന്തിരിവള്ളികള്‍ തളിര്‍ക്കുമ്പോള്‍ ദീപാവലി റിലീസായി തീയേറ്ററുകളിലേക്ക്.
നവംബര്‍ നാലിന് ചിത്രം തീയേറ്ററുകളിലെത്തും. ഫസ്റ്റ് ലുക്ക് ഒക്ടോബറില്‍ പുറത്തിറങ്ങും.
കോഴിക്കോട്ടെ ആദ്യഘട്ട ചിത്രീകരണത്തിന് ശേഷം ഈ സിനിമയുടെ ഷൂട്ടിംഗ് എറണാകുളത്ത് പുരോഗമിക്കുകയാണ്. മെഗാഹിറ്റായ ‘ദൃശ്യ’ത്തിന് ശേഷം മീന മോഹന്‍ലാലിന്റെ നായികയായെത്തുന്ന ചിത്രമെന്നതും ‘മുന്തിരിവള്ളികളു’ടെ പ്രത്യേകതയാണ്.
പ്രമുഖ ചെറുകഥാകൃത്ത് വി.ജെ.ജെയിംസിന്റെ ‘പ്രണയോപനിഷത്ത്’ എന്ന ചെറുകഥയെ ആധാരമാക്കി ഒരുക്കുന്ന സിനിമയ്ക്ക് തിരക്കഥ എഴുതുന്നത് എം.സിന്ധുരാജാണ്.
കുടുംബപശ്ചാത്തലത്തില്‍ നര്‍മ്മത്തിന്റെ മേമ്പൊടിയില്‍ അവതരിപ്പിക്കപ്പെടുന്ന എന്റര്‍ടെയ്‌നറാവും ചിത്രം
അനൂപ് മേനോന്‍, കലാഭവന്‍ ഷാജോണ്‍, അലന്‍സിയര്‍, ലിഷോയ്, രാഹുല്‍ മാധവ്, സുരേഷ് കൃഷ്ണ, സുരാജ് വെഞ്ഞാറമ്മൂട്, സുധീര്‍ കരമന, സോഹന്‍ സീനുലാല്‍, ഷറഫുദ്ദീന്‍, ശ്രിന്‍ഡ, മാസ്റ്റര്‍ സനൂപ് സന്തോഷ് എന്നിങ്ങനെ വലിയ താരനിരയാണ് ചിത്രത്തില്‍ അണിനിരക്കുന്നത്.
റഫീക്ക് അഹമ്മദ്, മധു വാസുദേവന്‍, ഡി.ബി.അജിത്ത്കുമാര്‍ എന്നിവരുടെ ഗാനങ്ങള്‍ക്ക് എം.ജയചന്ദ്രനും ബിജിബാലുമാണ് സംഗീതം പകര്‍ന്നിരിക്കുന്നത്. ഛായാഗ്രഹണം പ്രമോദ് പിള്ള. വീക്കെന്‍ഡ് ബ്ലോക്ക്ബസ്റ്ററിന്റെ ബാനറില്‍ സോഫിയാ പോളാണ് നിര്‍മ്മാണം.
പഞ്ചായത്ത് സെക്രട്ടറി ഉലഹന്നാനെയാണ് മോഹന്‍ലാല്‍ അവതരിപ്പിക്കുന്നത്. ഇയാളുടെ ഭാര്യ ആനിയമ്മയായി മീന വേഷമിടുന്നു.
