ഒടിടിയില്‍ തരംഗമായി പ്രിയദര്‍ശന്‍ സംവിധാനം ചെയ്ത ഹംഗാമ 2 . ജൂലൈ 26 മുതല്‍ ആഗസ്റ്റ് ഒന്ന് വരെയുള്ള ദിവസങ്ങളിലായി രാജ്യത്ത് ഏറ്റവും കൂടുതല്‍ ആളുകള്‍ ഓണ്‍ലൈനിലൂടെ കണ്ട സിനിമയുടെ പട്ടികയില്‍ ഹംഗാമ 2 ഒന്നാം സ്ഥാനത്ത്. മീഡിയ കണ്‍സള്‍ട്ടിങ് സ്ഥാപനമായ ഓര്‍മാക്‌സ് മീഡിയയാണ് ഒടിടിയില്‍ ഏറ്റവും കൂടുതല്‍ ആളുകള്‍ കണ്ട സിനിമകളുടെ പട്ടിക തയ്യാറാക്കിയത്.
എഴുപത് ലക്ഷത്തോളം ആളുകളാണ് ഡിസ്നി ഡിസ്നി ഹോട്ട്സ്റ്റാറിലൂടെ സിനിമ കണ്ടത്. അന്‍പത് ലക്ഷം കാണികളുമായി ആമസോണ്‍ പ്രൈം വിഡിയോ ഷോ ആയ ഹോസ്റ്റല്‍ ഡെയ്‌സ് സീസണ്‍ 2വാണ് രണ്ടാം സ്ഥാനത്ത്. നെറ്റ്ഫ്ളിക്സില്‍ റിലീസ് ചെയ്ത മിമിയാണ് മൂന്നാമത് എത്തിയിരിക്കുന്നത്. ഹോട്ട്സ്റ്റാറില്‍ സ്ട്രീം ചെയ്ത സിറ്റി ഓഫ് ഡ്രീംസ് എസ് 2, ആമസോണ്‍ പ്രൈം വിഡിയോ റിലീസ് ചെയ്ത രാകേഷ് ഓംപ്രകാശ് ചിത്രം തൂഫാന്‍ എന്നിവയാണ് നാലും അഞ്ചും സ്ഥാനങ്ങള്‍ നേടിയത്.
ഏഴ് വര്‍ഷങ്ങള്‍ക്ക് ശേഷം പ്രിയദര്‍ശന്‍ ബോളിവുഡില്‍ സംവിധാനം ചെയ്ത ഹംഗാമ 2 മലയാള സിനിമയായ മിന്നാരത്തിന്റെ റീമേക്കാണ്. 30 കോടി രൂപയ്ക്കാണ് ഹോട്ട്സ്റ്റാര്‍ സിനിമയുടെ അവകാശം സ്വന്തമാക്കിയത്. പരേഷ് റാവല്‍, ശില്പ ഷെട്ടി, പ്രണീത സുഭാഷ്, മീസാന്‍ ജാഫ്‌റി എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്.
