മുംബൈ: പ്രശസ്ത ബോളിവുഡ് നടി നിമ്മി അന്തരിച്ചു. 88 വയസായിരുന്നു. ശ്വാസകോശ സംബന്ധമായ അസുഖങ്ങളുമായി ഏറെ നാള്‍ ചികിത്സയിലായിരുന്നു. ജുഹുവിലെ സബര്‍ബന്‍ ആശുപത്രിയില്‍ വച്ചായിരുന്നു അന്ത്യം.
1950-60 കാലഘട്ടത്തില്‍ തിളങ്ങിനിന്ന നടി നിമ്മിയുടെ യഥാര്‍ത്ഥ പേര് നവാബ് ബാനു എന്നാണ്. 1949 ല്‍ പുറത്തിറങ്ങിയ ബര്‍സാത് എന്ന ചിത്രത്തിലൂടെയായിരുന്നു സിനിമയിലേക്കുള്ള നിമ്മിയുടെ അരങ്ങേറ്റം. പിന്നീട് നവാബ് ബാനു എന്ന പേര് മാറ്റി നടന്‍ രാജ് കപൂറാണ് നിമ്മി എന്ന പേര് നല്‍കിയത്.
സാസ, ആന്‍, മേരേ മെഹ്ബൂബ്, പൂജ കെ ഫൂല്‍, ആകാശ്ദീപ്, ബസന്ത് ബഹര്‍ തുടങ്ങിയവയായിരുന്നു നിമ്മിയുടെ ശ്രദ്ധേയമായ ചിത്രങ്ങള്‍.രാജ് കപൂര്‍, ദേവ് ആനന്ദ്, ദിലീപ് കുമാര്‍ എന്നിവര്‍ക്കൊപ്പം വേഷമിട്ടിട്ടുണ്ട്. 1986 ല്‍ പുറത്തിറങ്ങിയ ലൗ ആന്റ് ഗോഡ് ആണ് അവസാന ചിത്രം. 2007 ല്‍ അന്തരിച്ച എഴുത്തുകാരന്‍ അലി റാസയാണ് ഭര്‍ത്താവ്.
