എന്തിനും ഏതിനും പുതുമ ആഗ്രഹിക്കുന്നവരാണ് മനുഷ്യര്‍. ഇപ്പോള്‍ ഇതിനായി ഒരവസരം ഒരുക്കിയിരിക്കുകയാണ് മെട്രോ. ജന്മദിനവും വിവാഹവും ഇനി മെട്രോ കോച്ചില്‍ ആഘോഷിക്കാം. നോയ്ഡ മെട്രോ റെയില്‍ കോര്‍പ്പറേഷനാണ് ആഘോഷങ്ങള്‍ക്ക് വേദിയൊരുക്കുന്നത്.
അതിനായി പ്രത്യേകം കോച്ചുകള്‍ ബുക്ക് ചെയ്യാനും അവര്‍ അവസരമൊരുക്കിയിരിക്കുകയാണ്. മണിക്കൂറിന് 5000 രൂപമുതല്‍ 10,000 രൂപവരെമാത്രമാണ് ചെലവ്. ട്രെയിന്റെ പ്രവര്‍ത്തന സമയത്തും അല്ലാത്തപ്പോഴും ആഘോഷം സംഘടിപ്പിക്കാം. ഇതിലൂടെ നോയ്ഡ മെട്രോ റെയിലിന് വരുമാനമാകുമെന്നും അതോടൊപ്പം ആഘോഷിക്കാനൊരു പുതുമയുമാകുമിതെന്നും മെട്രോ റെയില്‍ എക്‌സിക്യുട്ടീവ് ഡയറക്ടര്‍ പി.ഡി ഉപാധ്യായ പറഞ്ഞു.
ഓടുന്ന മെട്രോയില്‍ അലങ്കാരങ്ങളില്ലാത്ത കോച്ച്-8000 രൂപ, നിര്‍ത്തിയിട്ടിരിക്കുന്ന അലങ്കാരങ്ങളില്ലാത്ത കോച്ച്-5000 രൂപ, ഓടുന്ന മെട്രോയില്‍ അലങ്കാരങ്ങളുള്ള കോച്ച്-10,000 രൂപ, നിര്‍ത്തിയിട്ടിരിക്കുന്ന അലങ്കാരങ്ങളുള്ള കോച്ച്-7000 രൂപ. 15 ദിവസംമുമ്പെങ്കിലും അപേക്ഷനല്‍കി ബുക്ക് ചെയ്യണം.
മെട്രോ സമയങ്ങളിലാകും ഓടുന്ന കോച്ചുകള്‍ അനുവദിക്കുക. ഓടാത്ത സമയമായ രാത്രി 11 മുതല്‍ പുലര്‍ച്ചെ രണ്ടുവരെയാകും നിര്‍ത്തിയിട്ടിരിക്കുന്ന കോച്ച് അനുവദിക്കുക. നാലു കോച്ചുവരെ ബുക്ക് ചെയ്യാം. തിരിച്ചുലഭിക്കുന്ന സെക്യൂരിറ്റിയായി 20,000 രൂപയും നല്‍കണം.
