യൂജിൻ: ജാവലിൻ ത്രോയിൽ ഇന്ത്യയുടെ മെഡൽ പ്രതീക്ഷയായ നീരജ് ചോപ്ര ലോക അത്‌ലറ്റിക്‌സ് ചാമ്പ്യൻഷിപ്പ് ഫൈനലിൽ. തന്റെ ആദ്യ ശ്രമത്തിൽ 88.39 മീറ്റർ കണ്ടെത്തിയാണ് നീരജ് ചോപ്ര ഫൈനലിൽ സ്ഥാനം ഉറപ്പിച്ചത്.
ഞായറാഴ്ചയാണ് ഈ ഇനത്തിലെ മെഡൽ റൗണ്ട്. 90 മീറ്ററിലേക്ക് ലോക ചാമ്പ്യൻഷിപ്പിൽ നീരജ് ചോപ്ര എത്തുമോ എന്ന കാത്തിരിപ്പിലായിരുന്നു കായിക പ്രേമികൾ. ഡയമണ്ട് ലീഗിൽ 89.94 മീറ്റർ എറിഞ്ഞ് നീരജ് സ്വർണവും ദേശിയ റെക്കോർഡും തന്റെ പേരിലാക്കിയിരുന്നു.
ജാവലിൻ ത്രോയിൽ ഈ വർഷം കണ്ടതിൽ ഏറ്റവും മികച്ച മൂന്നാമത്തെ ദൂരമാണ് ഡയമണ്ട് ലീഗിൽ 89.94 മീറ്റർ എറിഞ്ഞ് നീരജ് ചോപ്ര കണ്ടെത്തിയിരുന്നത്. ലോക അത്‌ലറ്റിക്‌സ് ചാമ്പ്യൻഷിപ്പിൽ ഫൈനൽ റൗണ്ടിലേക്ക് യോഗ്യത നേടാൻ 86.65 മീറ്റർ ദൂരം മാത്രമാണ് വേണ്ടിയിരുന്നത്‌. അത് നീരജിന് അനായാസം സാധിച്ചു.
