കൊച്ചി: രാജ്യത്ത് ഭാരത് എയര്‍ ഫൈബര്‍ പദ്ധതിക്ക് തുടക്കമിട്ട് ബിഎസ്എന്‍എല്‍. റേഡിയോ തരംഗങ്ങള്‍ വഴിയുള്ള അതിവേഗ ഇന്റര്‍നെറ്റ് സംവിധാനത്തിനാണ് ബിഎസ്എന്‍എല്‍ കൊച്ചിയില്‍ തുടക്കമിട്ടത്. ബിഎസ്എന്‍എല്‍ ഫൈബര്‍ കണക്ഷന്‍ വഴി ടെലിവിഷന്‍ ചാനലുകളും ഇനി മുതല്‍ കൊച്ചിയില്‍ ലഭ്യമാകും.
ഫ്‌ളാറ്റുകളിലും, ഓഫീസ് സമുച്ചയങ്ങളിലും ഒരൊറ്റ ഫൈബര്‍ കണക്ഷനിലൂടെ അതിവേഗ ഇന്റര്‍നെറ്റ് സൗകര്യം ഉറപ്പാക്കാം. ബിഎസ്എന്‍എല്‍ ഡാറ്റക്കായി എല്ലായിടത്തേക്കും ഭൂഗര്‍ഭ കേബിളുകള്‍ എത്തിക്കേണ്ട. കെട്ടിടത്തില്‍ ആവശ്യമായ കേബിളുകള്‍ ഒരുക്കി റേഡിയോ തരംഗങ്ങളിലൂടെ ഇന്റര്‍നെറ്റ് കണക്ഷനുകള്‍ ലഭ്യമാക്കാം.
അതേസമയം, വോയ്‌സും,ഡാറ്റക്കും പുറമെ കേബിള്‍ ടി വി കൂടി ലഭ്യമാക്കുന്ന ട്രിപ്പിള്‍ പ്ലേ സര്‍വീസും ബിഎസ്എന്‍എല്‍ തുടങ്ങുകയാണ്. ഇന്റര്‍നെറ്റ് പ്രോട്ടോ കോള്‍ ടെലിവിഷന്‍ അഥവാ ഐപിടിവി സംസ്ഥാനത്ത് ആദ്യമായി അവതരിപ്പിക്കുന്നതും കൊച്ചിയിലാണ്.
സ്മാര്‍ട്ട് ടിവിയിലും സാധാരണ ടിവികളിലും സേവനം ലഭ്യാമാകും. സാധാരണ ടിവി കളെ സ്മാര്‍ട്ട് ആക്കി മാറ്റാന്‍ 1600 രൂപ ചിലവില്‍ ഡിജിറ്റല്‍ മോഡം വെച്ചാല്‍ മതി. ഇതോടെ ഇന്റര്‍നെറ്റ് ബ്രൗസിംങ്ങും സാധ്യമാകും.
