മനാമ: ബഹ്‌റൈനിലെ പൗരന്മാർക്കും താമസക്കാർക്കുമായി 11 പുതിയ സേവനങ്ങൾ വികസിപ്പിച്ചതായി ആഭ്യന്തര മന്ത്രാലയത്തിലെ ദേശീയത, പാസ്‌പോർട്ട്, റെസിഡൻറ്സ് അഫയേഴ്സ് (എൻ.പി.ആർ.എ) അണ്ടർ സെക്രട്ടറി ശൈഖ് ഹിഷാം ബിൻ അബ്ദുൽറഹ്മാൻ ആൽ ഖലീഫ അറിയിച്ചു.
24 സർക്കാർ സ്ഥാപനങ്ങളിൽ 500 സേവനങ്ങൾ വികസിപ്പിക്കാനുള്ള കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ നിർദേശപ്രകാരമാണ് പുതിയ സേവനങ്ങൾ നടപ്പാക്കുന്നത്.നടപടിക്രമങ്ങൾ ലളിതമാക്കുക, പൂർണമായും ഇലക്‌ട്രോണിക് സേവനത്തിലേക്ക് മാറുക, സേവന നിലവാരം, കാര്യക്ഷമത, സാമ്പത്തിക വളർച്ചക്കുള്ള സംഭാവന എന്നിവ മെച്ചപ്പെടുത്തുന്നതിലാണ് പുതിയ സംരംഭം ഊന്നൽ നൽകുന്നത്.
നഷ്‌ടപ്പെടുകയോ കേടുപാടുകൾ സംഭവിക്കുകയോ ചെയ്ത പാസ്പോർട്ടുകൾക്ക് പകരം പാസ്‌പോർട്ട് നൽകൽ, ബഹ്‌റൈനിലെ പാസ്‌പോർട്ട് ഡെലിവറി, അടിയന്തര യാത്രാ രേഖകൾ, വേഗത്തിലുള്ള പാസ്‌പോർട്ട് മാറ്റിസ്ഥാപിക്കൽ, രാജ്യത്തിന് പുറത്തുള്ളവർക്ക് പകരം പാസ്‌പോർട്ട് എന്നിവ പുതിയ സേവനങ്ങളിൽ ഉൾപ്പെടുന്നു.
Also Read:അമിതവേഗം; ദുബൈയിൽ ഡ്രൈവര്‍ അറസ്റ്റില്‍
പെർമിറ്റ് കാലഹരണപ്പെട്ട താമസക്കാർക്ക് ഗ്രേസ് പിരീഡുകൾ നൽകുന്നതിനൊപ്പം റെസിഡൻസി പെർമിറ്റുകൾ നൽകുന്നതും പുതുക്കുന്നതും ഇനി ഓൺലൈനായി നടക്കും.100 ശതമാനം ഡിജിറ്റൽ ക്ഷമത കൈവരിക്കുക, ആവശ്യമായ രേഖകളുടെ എണ്ണം പകുതിയാക്കി കുറക്കുക, ഉപയോക്തൃ അനുഭവം മെച്ചപ്പെടുത്തുന്നതിന് ആപ്ലിക്കേഷൻ പ്രക്രിയകൾ ലളിതമാക്കുക എന്നിവയാണ് എൻ.പി.ആർ.എ ലക്ഷ്യമിടുന്നതെന്ന് ശൈഖ് ഹിഷാം പറഞ്ഞു.
