ജമ്മു: രാജ്യത്തിനുവേണ്ടി ധീരമായി പോരാടുകയും മരണം വരിക്കുകയും ചെയ്യുന്നവരാണ് ഒരോ സൈനികനും. അവർക്കൊപ്പം തന്നെ രാജ്യത്തിനായി സേവനം ചെയ്യുന്നവരാണ് സൈനിക നായകളും. പലപ്പോഴും ധീരരായ പട്ടാളക്കാരെ പോലും വേദനയിലാഴ്ത്തുന്നതാണ് അവരുടെ വേർപാട്. കഴിഞ്ഞ ദിവസമാണ് 09 പാരാ സ്‌പെഷ്യൽ ഫോഴ്‌സിലെ ഫാന്റം എന്ന നായ വീരമൃത്യു വരിച്ചത്.
ബെൽജിയൻ മെലിനോയ്‌സ് വിഭാഗത്തിൽപെട്ട നായയായ ഫാന്റം 2020 മേയ് 25-നാണ് ജനിച്ചത്. ഉത്തർപ്രദേശിലെ മീററ്റിലെ റീമൗണ്ട് വെറ്ററിനറി കോറിലായിരുന്നു പരിശീലനം. ജമ്മു കശ്മീരിലെ അഖ്‌നൂർ സെക്ടറിൽ ഭീകരരുടെ ഒളിത്താവളങ്ങൾക്കായി തിങ്കളാഴ്ച നടത്തിയ തിരച്ചിലിനിടെയാണ് ഫാന്റത്തിന് വെടിയേറ്റത്.
‘ഞങ്ങളുടെ ഹീറോ, ധീരനായ സൈനിക നായ ഫാന്റത്തിന്റെ അത്യുന്നതമായ ജീവത്യാഗത്തെ ഞങ്ങൾ സല്യൂട്ട് ചെയ്യുന്നു. നമ്മുടെ സൈന്യം ഭീകരർക്കുനേരെ അടുക്കുമ്പോൾ ഫാന്റത്തിന് ശത്രുക്കളുടെ വെടിയേൽക്കുകയായിരുന്നു. അവന്റെ ധൈര്യവും വിശ്വസ്തതയും സമർപ്പണബോധവും ഞങ്ങൾ ഒരിക്കലും മറക്കില്ല.’ -ഫാന്റത്തിന് അന്ത്യാഭിവാദ്യമർപ്പിച്ചുകൊണ്ട് സൈന്യത്തിന്റെ വൈറ്റ് നൈറ്റ് കോർ എക്‌സിൽ കുറിച്ചു. ഫാന്റത്തിന്റെ ചിത്രങ്ങളും പങ്കുവെച്ചിരുന്നു.
Also Read: വ്യാജ ബോംബ് ഭീഷണി; ഇ-മെയിലുകൾക്ക് പിന്നിൽ എഴുത്തുകാരൻ
രാവിലെ ആറരയോടെ സേനയുടെ ആംബുലൻസിന് നേരെയും ഭീകരാക്രമണമുണ്ടായി. സൈനികർ പ്രത്യാക്രമണം നടത്തിയതോടെ ഭീകരർ സമീപത്തെ വനമേഖലയിലേക്ക് രക്ഷപ്പെട്ടു. പിന്നാലെ സൈന്യം ഭീകരർക്കായുള്ള തിരച്ചിൽ ആരംഭിക്കുകയായിരുന്നു. ഒരു കെട്ടിടത്തിന്റെ നിലവറയിൽ ഒളിച്ചിരിക്കുന്ന നിലയിൽ ഭീകരരെ കണ്ടെത്തിയതോടെ വെടിവെപ്പ് ആരംഭിച്ചു.
ഇതിനിടെയാണ് തിരച്ചിൽ സംഘത്തിന് വഴികാട്ടിയായിരുന്ന സൈനിക നായ ഫാന്റത്തിന് വെടിയേറ്റത്. അധികം വൈകാതെ ഫാന്റത്തിന് ജീവൻ നഷ്ടമായതായി സൈനിക വൃത്തങ്ങളെ ഉദ്ധരിച്ച് മാധ്യമങ്ങൾ റിപ്പോർട്ടുചെയ്തു.ഇതിന് ശേഷം 2022 ഓഗസ്റ്റ് 12 മുതൽ ഫാന്റം സേനയുടെ ഭാഗമാണ്. നേരത്തേ 2022 ഒക്ടോബർ ഒമ്പതിന് ജമ്മു കശ്മീരിലെ അനന്ത്‌നാഗിലെ ഭീകരവിരുദ്ധ ദൗത്യത്തിനിടെ സൈനിക നായയായ സൂം വീരമൃത്യു വരിച്ചിരുന്നു.
