ചെന്നൈ: പുതുച്ചേരിയിൽ ദീപാവലി ആഘോഷത്തിനെത്തിയ16 കാരിയെ ഏഴുപേർ ചേർന്ന് ക്രൂരമായി പീഡിപ്പിച്ചു. പ്രതികളിൽ നാലു പേരെ പോലീസ് അറസ്റ്റ് ചെയ്തു. മൂന്ന് പേർക്കായി തിരച്ചിൽ തുടരുകയാണ്. ദീപാവലി ആഘോഷിക്കാനായി മുംബൈയിൽ നിന്ന് ബന്ധുവിന്റെ വീട്ടിലെത്തിയ 16 കാരിയാണ് പീഡനത്തിനിരയായത്.
ദീപാവലി ആഘോഷത്തിനിടെ അമ്മയുമായി വഴക്കിട്ട് പെൺകുട്ടി വീട്ടിൽ നിന്ന് ഇറങ്ങുകയായിരുന്നു. പിന്നീട് ഓട്ടോയിൽ കയറിയ പെൺകുട്ടി വിനോദ സഞ്ചാരകേന്ദ്രങ്ങളിലേക്ക് കൊണ്ടുപോകാൻ ആവശ്യപ്പെട്ടു. എന്നാൽ ഓട്ടോക്കാരൻ പെൺകുട്ടിയെ തന്റെ വീട്ടിൽ കൊണ്ടുപോവുകയും മദ്യം നൽകി പീഡിപ്പിക്കുകയായിരുന്നു.
ഓട്ടോക്കാരൻ പിറ്റേ ദിവസം പെൺകുട്ടിയെ ഓറോവില്ലിൽ ഇറക്കിവിട്ടു. തുടർന്ന് റോഡിൽ അലഞ്ഞുനടന്ന പെൺകുട്ടിയെ സൗഹൃദം സ്ഥാപിച്ച് അവിടെ ഉണ്ടായിരുന്ന ഐടി ജീവനക്കാരായ ചില യുവാക്കൾ ചെന്നൈയിലെത്തിച്ച് വീണ്ടും പീഡനത്തിനിരയാക്കി. പിന്നീട് നവംബർ രണ്ടിന് യുവാക്കൾ പെൺകുട്ടിയെ പുതുച്ചേരി ബീച്ചിന് സമീപം ഇറക്കിവിട്ടു. അവിടെനിന്നാണ് പൊലീസ് പെൺകുട്ടിയെ കണ്ടെത്തിയത്.
സംസാരിക്കാൻ പോലും കഴിയാത്ത നിലയിലായിരുന്നു പെൺകുട്ടിയുടെ അവസ്ഥ. പോലീസ് പെട്ടെന്ന് തന്നെ പെൺകുട്ടിയെ ആശുപത്രിയിൽ പ്രവേശിപ്പിച്ചു. പിന്നീട് മൊഴിയെടുത്തപ്പോഴാണ് പെൺകുട്ടി ക്രൂരപീഡനത്തിനിരയായതായി അറിയുന്നത്. തുടർന്ന് സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ പരിശോധനയിൽ പൊലീസ് പ്രതികളെ പിടികൂടുകയായിരുന്നു.
