മാനന്തവാടി: പെൺകുട്ടികളോട് മോശമായി പെരുമാറിയത് ചോദ്യം ചെയ്ത സ്ത്രീയെ ആക്രമിച്ചയാൾ പിടിയിൽ. വയനാട് തിരുനെല്ലിയിലാണ് സംഭവം. പെൺകുട്ടികളോട് മോശമായി പെരുമാറിയ മധ്യവയസ്കനെ ചോദ്യം ചെയ്ത യുവതിയുടെ കയ്യിൽ കയറി പിടിച്ച് ഇയാൾ ഭീഷണിപ്പെടുത്തുകയും ചെയ്തിരുന്നു. പനവല്ലി കാരാമ വീട്ടിൽ രാജു (45) വിനെയാണ് അറസ്റ്റ് ചെയ്തത്.
തൃശ്ശിലേരിയിലെ ഒരു സ്വകാര്യ സ്ഥാപനത്തിൽ ജോലി ചെയ്തു വരുന്ന പെൺകുട്ടികളോട് രാജു മോശമായി പെരുമാറിയത് ചോദിക്കാനെത്തിയപ്പോഴായിരുന്നു ഇയാൾ പരാതിക്കാരിക്കെതിരെ അതിക്രമം നടത്തിയത്. കത്തി കാണിച്ച് കൊല്ലുമെന്ന് ഭീഷണിപ്പെടുത്തുകയും നഗ്‌നത പ്രദർശിപ്പിക്കുകയും ചെയ്തുവെന്നാണ് പൊലീസിന് ലഭിച്ചിട്ടുള്ള പരാതിയിലുള്ളത്. രാജു പരാതിക്കാരിയുടെ കയ്യിൽ കയറിപ്പിടിച്ച്, കത്തി കാണിച്ച് വെട്ടി നുറുക്കി പുഴയിൽ എറിയുമെന്ന് പറഞ്ഞു.
പിന്നാലെ പലപ്പോഴായി പുഴക്കരയിൽ വച്ച് നഗ്‌നത പ്രദർശിപ്പിക്കുകയുമായിരുന്നു. തിരുനെല്ലി പൊലീസ് സബ് ഇൻസ്പെക്ടർ പി. സൈനുദ്ധീൻ, സീനിയർ സിവിൽ പൊലീസ് ഓഫീസർമാരായ ഒ.വി ജെയ്‌സൺ, പി.ജെ. ജിൽജിത്ത്, എം.കെ രമേശ്, സിവിൽ പൊലീസ് ഓഫീസറായ കെ.എച്ച് ഹരീഷ് എന്നിവരാണ് അന്വേഷണം നടത്തി രാജുവിനെ കസ്റ്റഡിയിലെടുത്തത്. ചോദ്യം ചെയ്തതിന് ശേഷം അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
