ലോകത്തിൽ ഏറ്റവും വേഗത്തിൽ ഓടുന്ന റോബോയെ നിർമ്മിച്ച് ചൈനയിലെ ഒരുകൂട്ടം ഡെവലപ്പർമാർ. ഹ്യൂമനോയിഡ് റോബോട്ടായ ‘സ്റ്റാർ 1’ ടെസ്‍ലയുടെ ഓപ്റ്റിമസിനെയും ബോസ്റ്റൻ ഡൈനാമിക്സിന്റെ ‘അറ്റ്ലസിനെ’യും തോൽപിക്കുമെന്നാണ് വിലയിരുത്തൽ. 5.6 അടിയാണ് സ്റ്റാർവണിന്റെ ഉയരം. 65 കിലോയാണ് ഭാരം.
ഒരു മണിക്കൂറിൽ 13 കിലോമീറ്ററാണ് സ്റ്റാർ വണിന്റെ വേഗത. പ്രമോഷൻ വിഡിയോയിൽ രണ്ട് സ്റ്റാർ 1 റോബോട്ടുകൾ ഗോബി മരുഭൂമിയിലൂടെ ഓടി മത്സരിക്കുന്നത് കാണാനാകും. വേഗത പരിശോധിക്കുന്നതിനായി രണ്ടിൽ ഒരു റോബോട്ടിനെ സ്നീക്കേഴ്സ് ധരിപ്പിച്ചിരുന്നു. ദുർഘടമായ പാതകളിലൂടെയും ഇരുവരും വേഗത നിലനിർത്തി ഓടുന്നത് കാണാം.
