ഗാസ്സ: ഗാസ്സയിൽ ആളുകള്‍ അഭയം പ്രാപിച്ച സ്‌കൂളില്‍ ഉണ്ടായ ഡ്രോണ്‍ ആക്രമണത്തില്‍ കുട്ടികളടക്കം 10 പേര്‍ കൊല്ലപ്പെട്ടതായി റിപ്പോർട്ടുകൾ. ജബലിയയുടെ പ്രാന്തപ്രദേശത്തുള്ള സഫ്തവാവിയിലെ അല്‍-നസ്ല സ്‌കൂളില്‍ അഭയം പ്രാപിച്ചവര്‍ക്കുമേലാണ് ആക്രമണം നടന്നത്. സമീപ പ്രദേശങ്ങളില്‍ ആക്രമണം നടക്കുമ്പോള്‍ സ്‌കൂള്‍ താത്ക്കാലിക അഭയ കേന്ദ്രമാക്കി രക്ഷപെടാന്‍ ശ്രമിച്ചവരാണ് കൊല്ലപ്പെട്ടത്.
ഗാസയില്‍ മാനുഷിക സ്ഥിതി മോശമായിക്കൊണ്ടിരിക്കുകയാണെന്ന് യുഎന്‍ ഏജന്‍സികള്‍ മുന്നറിയിപ്പ് നല്‍കിയ സമയത്താണ് ആക്രമണത്തിന്റെയും മനുഷ്യ ജീവന്‍ പൊലിയുന്നതിന്റെയും ദുഖകരമായ വാര്‍ത്ത എത്തുന്നത്. ഗാസയില്‍ നിലവില്‍ 36 ആശുപത്രികളില്‍ 15 എണ്ണം ഭാഗികമായി മാത്രമേ പ്രവര്‍ത്തനക്ഷമമായിട്ടുള്ളൂവെന്നും 21 ആശുപത്രികള്‍ പ്രവര്‍ത്തനരഹിതമാണെന്നും ആറ് പ്രവര്‍ത്തനക്ഷമമായ ഫീല്‍ഡ് ആശുപത്രികളുണ്ടെന്നും റിപ്പോര്‍ട്ട് പറയുന്നു.
നിലവിലുള്ള ആശുപത്രികള്‍ ബെഡ് കപ്പാസിറ്റിയുടെ നാലിരട്ടിയിലധികം പ്രവര്‍ത്തിക്കുന്നുണ്ടെന്നും റിപ്പോര്‍ട്ടുണ്ട്. വടക്കൻ ഗസ്സയിലെ ആരോഗ്യ സംവിധാനമെല്ലാം തകർന്നു കിടക്കുന്നതിനാലും ഇന്ധനക്ഷാമം കാരണം ആംബുലൻസുകൾക്ക് വരാൻ കഴിയാത്തതിനാലും പരിക്കേറ്റവർക്ക് ചികിത്സ നൽകാൻ പ്രയാസപ്പെട്ടു. 24 മണിക്കൂറിനിടെ 46 പേർ കൂടി ഇസ്രായേൽ ആക്രമണത്തിൽ കൊല്ലപ്പെട്ടു. 130 പേർക്ക് പരിക്കേറ്റു. ഇതോടെ ഗസ്സ യുദ്ധത്തിൽ കൊല്ലപ്പെട്ട ഫലസ്തീനികൾ 35,903 ആയി. 80,420 പേർക്ക് പരിക്കേറ്റു.
