റീറിലീസുകളിൽ പുതുചരിത്രമെഴുതി ബോളിവുഡ് ഫാൻ്റസി ഹൊറർ ചിത്രം ‘തുമ്പാഡ്’. റീറിലീസ് ചെയ്തതിൽ ഇന്ത്യയിൽ നിന്ന് ഏറ്റവുമധികം കളക്ഷൻ നേടിയ ചിത്രം ‘തുമ്പാഡ്’ സ്വന്തമാക്കി എന്നാണ് റിപ്പോർട്ടുകൾ. വിജയ് ചിത്രം ’ഗില്ലി’യുടെ റെക്കോഡാണ് ‘തുമ്പാഡ്’ തകർത്തെറിഞ്ഞത്. രാഹി അനിൽ ബാർവെ സംവിധാനം ചെയ്ത മികച്ച നിരൂപണ പ്രശംസ നേടിയ ചിത്രമാണ് ‘തുമ്പാഡ്’.സോഹം ഷാ, ജ്യോതി മാൽഷെ തുടങ്ങിയവരാണ് ഈ ഹൊറർ-ഫാൻ്റസി ചിത്രത്തിൽ പ്രധാനവേഷത്തിൽ എത്തിയത്.
ALSO READ: എഐ മൂലം 10 വർഷത്തിനുള്ളിൽ സംഗീതസംവിധായകർക്ക് പണിയില്ലാതെയാവും; യുവൻ ശങ്കർ രാജ
റീറിലീസ് ചെയ്ത 12-ാം ദിവസമാണ് ചിത്രം റെക്കോഡ് കളക്ഷൻ സ്വന്തമാക്കിയത്. റിപ്പോർട്ടുകൾ പ്രകാരം ഇതുവരെ 24.67 കോടിരൂപയാണ് ചിത്രം നേടിയത്. ഹോളിവുഡ് ചിത്രം ‘ടെെറ്റാനിക്’ ആയിരുന്നു ഗില്ലിക്ക് മുൻപ് റെക്കോഡ് സ്വന്തമാക്കിയിരുന്ന ചിത്രം. 18 കോടി രൂപയായിരുന്നു ‘ടെെറ്റാനിക്കി’ൻ്റെ ഇന്ത്യയിലെ കളക്ഷൻ.
ആദ്യം പ്രദർശനത്തിന് എത്തിയപ്പോൾ നേടിയതിലും ഉയർന്ന തുകയാണ് ചിത്രം രണ്ടാംവരവിൽ സ്വന്തമാക്കിയിരിക്കുന്നത്. ആറ് വർഷങ്ങൾക്ക് ശേഷം 2024 സെപ്റ്റംബർ 13-നാണ് ചിത്രം റീറിലീസ് ചെയ്തത്. 12.5 കോടി രൂപയായിരുന്നു ആദ്യതവണ പ്രദർശനത്തിനെത്തിയപ്പോൾ നേടിയത്. ചിത്രത്തിൻ്റെ രണ്ടാം ഭാഗവും പ്രഖ്യാപിച്ചിട്ടുണ്ട്. ലോകവ്യാപകമായി ചിത്രം റീറിലീസ് ചെയ്യാൻ നിർമാതാക്കൾ ഒരുങ്ങുകയാണ് ഇപ്പോൾ.
