കുവൈത്ത് സിറ്റി:സീസണിൽ ടിക്കറ്റ് നിരക്ക് ഉയർത്തുന്നതിനൊപ്പം ബാഗേജ് നിരക്കും ഉയർത്തുന്നത് വിമാനകമ്പനികളുടെ പതിവാണ്. എന്നാൽ കുവൈത്തിൽ നിന്ന് നാട്ടിലേക്കുള്ള അധിക ബാഗേജ് നിരക്കിൽ ഇനി ആശങ്ക വേണ്ട. ഓഫ് സീസണിൽ ബാഗേജ് നിരക്കിൽ എയർ ഇന്ത്യ എക്സ്പ്രസും ഇൻഡിഗോയും ഇളവുകൾ പ്രഖ്യാപിച്ചിട്ടുണ്ട്. നിലവിൽ തിരക്കേറിയ സീസണായതിനാൽ അധിക ബാഗേജിന് വലിയ തുകയാണ് വിമാനകമ്പനികൾ ഈടാക്കിയിരുന്നത്.
എയർ ഇന്ത്യ എക്സ്പ്രസിൽ ജൂലൈ, ആഗസ്റ്റ് മാസങ്ങളിലും ഇൻഡിഗോയിൽ ജൂലൈ, ആഗസ്റ്റ്, സെപ്റ്റംബർ മാസങ്ങളിലുമാണ് ഇളവ്. എയർ ഇന്ത്യ എക്സ്പ്രസിൽ അധിക ബാഗേജിന് 10 കിലോക്ക് 13 ദിനാറും ഇൻഡിഗോയിൽ നാലു ദിനാറുമായാണ് കുറച്ചത്. കുവൈത്തിൽ നിന്ന് നാട്ടിലേക്ക് നിലവിൽ 30 കിലോ ചെക്ക് ഇൻ ബാഗേജും തിരിച്ച് 20 കിലോ ചെക്കിൻ ബാഗേജും ഏഴ് കിലോ കാബിൻ ബാഗേജും സൗജന്യമായി കൊണ്ടുവരാം.
അതേസമയം, കഴിഞ്ഞ ഓഫ് സീസണിൽ ഡിസംബർ 11 വരെ 10 കിലോ അധിക ബാഗേജിന് ഒരു ദിനാർ എന്നനിലയിലേക്ക് ബാഗേജ് നിരക്ക് കുറച്ചിരുന്നു. ഓഫ് സീസണിൽ വിമാന ടിക്കറ്റ് നിരക്കിലും കമ്പനികൾ കുറവുവരുത്തിയിട്ടുണ്ട്. ഇതിനൊപ്പമാണ് യാത്രക്കാരുടെ തിരക്ക് കുറയുന്നത് കണക്കുകൂട്ടി ബാഗേജ് നിരക്കും കുറക്കുന്നത്.
